Marketing
„Mašogadur“ posvuduša po EU
Počelo je još prije par godin, kad me je Đuro iz Šveske umeja da mu pošaljen Mašogadur. Pa san mu posla u PDF formatu. Pa je posla on mene namo di smo svi mi bili bar jedan put u životu ... da kako će nosit laptop u kondut (zahod, za sjevernjake) kad gre poslat fax (posrat se, za sjevernjake).
Je, Zlatan je ovi put bija u pravu, mora mu se priznat. Tako san, uz odobrenje ostale ekipe iz KPU „Kampanel“ počeja slat našu reprezentativnu tiskovinu, da ne rečen godišnjak, po Europama. Jema našega svita i dalje, od Amerik do Australije, ali će se oni ipak morat zadovoljit sa PDF formaton.
Lipo bi uzeja u ponediljak, užežin pokladnoga ponediljka, naramak “Mašogaduri“ i prošeta po kancelarijan bele zgrade (Gradska uprava Kaštela, za sjevernjake) ... Redovito bi proda barenko dvadesetak primjeraka, ča bi taman lipo poslužilo za financiranje poštanske ekspedicije „Mašogadur po Europama“ ... O brzina našega opjevanoga potomka „Pony Expressa“ ne vridi više trošit beside, jer je sve odavna rečeno! Obični vinogradski puž je za nji MiG 35!!!.
Za neke san se debelo načeka da mi pošaljedu slike sa Mašogaduron ... pogotovo od onega švedskoga medvida tako da me je malo sve to i štufalo.
Tek mi je danas palo napamet da nisan meknija slike sa lanjskin Mašogadurima.
Triba to pod hitno ispravit ... a i moran priznat da san se malo ulinija ... od Novogodišnje inspekcije i Mirelline kvizaške večere nisan napisa njanci beside na blogu ... evo, sramin se i stidin se!
Zato, najprin da sredimo zaostatke. Evo oni ča su bili vridni pa poslali slike ... potrajalo je dokle nije pošta do svi dospila ... a još više dokle su se primadone sitile slikat i poslat „za dokumentaciju“ ...
Počmimo najprin od oni u Lipoj Našoj, jedan je primjerak iša kod Vlatke, na otok Murter ...
... a drugi kod našega Marina pumpjera u postojbini Krapinskog pračovjeka ...
Inače on nije tako sramežljiv, ali je bija baš ništo “tehnički neispravan” u doba kad se tribalo slikat, pa je dobro i ovo ča je posla, za razliku od drugi koji će me i ove godine žicat primjerak a nisu se bili vridni slikat 
Malo gori, sjevernije išlo je kod Aljoše u Norvešku ...
... i kod već puno puti spomenutoga švedskoga polarnoga medvida u Malmo ... srića njegova da se ne umire od štucavice 
U Italiju su partila dva primjerka, kod Jelene ...
... i kod Mikija ...
U zemlju zelene diteline odletija je samo jedan ... u ruke naše ex Bepine ...
... dok smo njemačko govorno područje pokrili kod Bože na ušću Elbe u Baltik ...
... i kod našega dotura Antonija u Grazu ...
Bome, naš obljetnički „Mašogadur“, koji je na naslovnici jema sve dosadašnje One_koji_su_za_sve_krivi je učinija lipu điradu ... nadan se da će oni koji ga budu tražili ove godine bit malo žveltiji & ažurniji za poslat svoj „Portret sa Mašogaduron“ jer ako opet zaribaju (a znan koji su!) ne triba in ga više pitat, pa sad neka se žalidu upravi Maškar i drugu Sekretaru Buišu osobno. Howgh!
Njanci ne brojin one kojima san posla PDF ... vrlo rado i ove godine ...ali ne smin još. Zabranili su mi da ga šajen pri onoga ponediljka užežin pokladnoga utorka, iako je tehnički i sad spreman ka zapeta puška 
Sutra, u subotu, je mali lokalni maškarani party u caffe baru „Arena“ ... možda i povirin, možda i potegnen koju sliku ...
Ako ne pri, vidimo se na našu maškaranu povorku u Mašogradu, znate već, ka prvi put je, ono kad i di ...
... a ako slučajno jema koji od vas, dragi štioci, da još nije pogleda lanjski Mašogadur, evo mu di ga more skinit i odma učinit pokoru od deset OčeNaši i duzinu (tucet, za sjevernjake) ZdravoMariji. Amen!
Zdravi i veseli bili!!! 
Update:
Mali Pajo i Panca su mi naknadno poslali sliku ... eto, pa da ne budu zakinuti
Post je objavljen 14.02.2020. u 21:38 sati.