Marketing
BEZ ČESTITKE
Ne govoriju bez veze da je napad najboja obrana. Tako je bilo i danas, nisan ni doša do stola di me ceka odma je poce.
- Tovar si Bebiću i to veliki.
- Zac, ca san ucini?
- Pa da Ti namim ovo godišće nisi čestita Božić.
- Kako Ti nisan čestita Božić?
- Ne pravi se munjen, preko bloga, ove godine nanka besede.
- Je fali san. Tri dana nisan taka kompjuter i kada san ša pogedat, vidim da nisan napisa čestitku. Izvinjavan se judima, jer se to do sada ni dogodilo.
Nakon tog napada uvati se Matea a Matea baš briga ca on govori, on je uze moj telefon i igra igrice.
- Ca je mali posta si plivač, to si na Vodice nauci?
- Nisam.
- Onda, di si uci plivat?
- Na bazenu.
- Ma je, baš si se na bazen nauci kupat.
Vidi da ga Mateo previše ne doživljava, pa se opet uvati mene. Ni moga a da se ne dotakne politike.
- Lipo ti je Kolinda pasala na izbori.
- Ca je fali?
- Pomest će je Milanović?
- Živi bili pa vidili i ne tentaj više. Ca si ti ovde doša mene napinjat. Meni ne triba tlak dizat, nego ga kalivat.
- Ca ti se Bebiću cini ovaj Advent u Pag?
- Odlično, svaka čast organizatorima. Ne mogu sva dica poć u Zagreb, niti se stalno moramo vraćat u Casku.
- To i ja mislin i lipo je da je tako. Jesi vidi da su u Riku već pocele pripreme za karneval?
- I mi se parićivamo već misec dan.
- Ca se Ti parićivaš?
- Mateo je potpisao pristupnicu i od ove godine je Dondolaš. Nabavili smo svu monturu. Koža je sašivena, krabuja se nacinja, roba je već doma. Mi smo parićani za karneval. Pitaj Matea pa ćeš vidit ca on govori.
- Onda je istina ovo ca ti otac govori.
- Istina je.
- Kad nećete u Pag, onda se deržite običaja na Grobnik.
- Ne baculaj.
Reka je da još mora poć na pijacu, da više nima vrimena. Uvik nešto izmisli jer pol ure njega ubije bit na jedno misto. Nosi neki kalendari sa sobon, da to mora podilit, pun je problema. Mi smo još malo uživali u ovom prekrasnom vrimenu na Korzo prije ubeda.
Post je objavljen 28.12.2019. u 16:49 sati.