Pregled posta

KAKO JE DOBRO VIDJETI TE OPET

- Kako je dobroooo, vidjeti te opet!
- Samo Ti pivaj.
- Kako neću kada te vidim. Glavno da si ti meni živ i zdrav Bebiću, udri brigu na veseje.
Tako je pocelo naše druženje prejcera. Korzo pun judi, bor na credini Korza, tema za ćakule koliko ti serce želi.

- Ca je to Advent Bebiću ? Jesmo mi noga puta imali taj Advent, je ki zna za to? U Pag je uvik bilo Došašće, malo je ki govori, Advent. Bila je sveta Lucija, Badnjak i Božić, nanka se Stipanja ni slavila toliko, ili ja krivo govorin.
- Imaš pravo, taj Advent ni bi toliko naglašen, nego blajdani kih si spomenu. U crikvu se znalo za Advent, ali mi smo slavili navedeni blajdani. Cekali smo svetu Luciju više nego Boga, samo radi pune kalcete. Koliko je samo smiha bila za tu svetu Luciju. Sada ću Ti ispripovidat jednu moju svetu Luciju u Riku. Ja san bi kod tete Marije i barba Beržice i navecer smo na barkun, ja i pokojni Diogen stavili kalcete. Dragi moj ima si ti sutra jutro ca vidit. U mojoj kalceti svega slatkoga, a u Diogenovoj i falši zubi, kapule, baložice od miša, razbijeni očali za čitat i ca ti ja znan ca je sve teta Marija unutra stavila. Diogen je poce plakat. Onda mu je teta Marija rekla:-Diogene ali nisi pogeda ca ti je u kalcetu kod malog barkuna. U tu kalcetu mu je bilo svega. Kakvo je to onda bilo veseje u kuću. Diogen je odma uze harmoniku i poce svirat. Vidiš Ti kompanjo moj kako vrime gre. Svi su pošli, i teta Marija i Papić Beržica i ovo lito Diogen.
- Kako si to ti bi kod tete Marije?
- Teta Marija i Papić Beržica su mojoj materi vjenčani kumovi, a teta Marija je mojoj nani perva rodica, sto put san Ti to reka, da im je mat bila Lučinka, sestra mome pradedu Jadri. Mat mi je bila na brod sa ocen, a ja san sta kod tete Marije na Potoku.

- Koliko je njih Bebiću bilo?
- Bile su cetiri sestre, teta Ruža u Telera, teta Lenka za barba Jerića Mekušića, teta Luce u Bujka, teta Marija u Beržice i brat in barba Božo.
- Ma ne to, nego koliko je bilo njih Lučinovih?
- Cetiri brata i sestra. Brati su bili moj praded Jadre, barba Ive, barba Mate, barba Valo i sestra in Marija.
- Dobro tebe služi pamet, Bebiću. Kada sad vidim kako ste vi tamo svi iskrižani, covik ne more verovat.

ŠKULA I PROBLEMI SA ŠKULON

- A kada san Ti govori da su i mat i sin mojoj nani pervi rojaci nisi verova.
- Pustimo mi to Bebiću, nego reci mi kako ovaj mali u škulu. Ni se triba ni upisat ovo godišće u škulu, ni boje da se još igra.

- To je cramota prijateju moj. Ca reć, dat in plaće? Znaš ca bi in ja da?
- To oćeš reć da bi in ti zabrani štrajkat?
- Neka oni štrajkaju, govoriju da je to njihovo pravo, ali je i pravo dice hodit u škulu. I najboji su mi oni koji radi svojih prava braniju drugima njihova prava. Ma jesi vidi. To ti je isto kao i oni ca štrajkaju na zebrama da zaustaviju promet, pa je covik umra u kolima hitne pomoći jer ih nisu stili pustiti radi njihovih prava. Ma vidi bogati. Štrakaj ti prijateju moj koliko god oćeš, samo nemoj meni moja prava uzimat, a ca se mene tiće mogu štrajkat ako ćeju šest godišć, samo ne na mojoj grbaći. Ja da punin državni proračun za tvoju penziju, za njihove plaće i niki ništa da ne radi. Ne gre to tako kumpanju moj pa ca god Ti misli o tome.
- Moga bi se složit stobon ali ne sa svin.
- A ca san krivo reka?
- Ja san za svoju penziju radi ceterdeset godišć?
- Da, ali tad kada si Ti radi neki drugi su koristili ti šoldi, sada neki drugi judi radiju da bi Ti dobi penziju. Ali meni to ni krivo. Krivo mi je za ove uhljebe. Od devetog miseca kada je poša u škulu, Mateo je nauci dva slova. Pa to je škula, to su učitelji? Odi molim te zbogon. Više je vridila ona moja čitanka "Sunce na prozorčiću", nego svi ovi njihovi tableti i škula za život. Lipo su odma na pocetak života naucili.

- Ne govoriš ti Bebiću bez veze, ali danas je sve drugacije nego noga puta.
- Je, kako da ne. Sada su se slova okrenula napak. Koda noga puta i sad slova A ni slovo A. Sada je malo drugacije. A, kako će dite naucit čitat ako ni nauci slova? Kad smo došli pervi dan u škulu onda je ravnateljica pitali da neka digneju ruku ona dica ka znaju čitat. Ja san misli da će ih odma prehitit u drugi razred. Ca će ju oni u pervi razred ako znaju čitat? Ja san Matea upisa u pervi razred da nauci čitat. Da san ja to zna, ja bi ga bi celo lito uci čitat, nebi ga more vidilo, pa bi bi doša u škulu ka napredno dite, ovako je doša ka nazadno, jer ni zna čitat. To je koda si doša u Auto škulu i reka in, ja znan vozit. Odma neka ti izdaju vozačku dozvolu, ca ćeš se zajebavat tamo vježbat, kada znaš vozit. Zac postoje škule? Zac se čipkarska škula zove tako, zac se ne zove čipkarski tečaj. Vajda se tamo u tu škulu nešto uci. Ja to gedan tako kumpanjo moj, a kako Ti baš me briga.
- Bebiću pamet uglavu jer ni dobro ratovat sa učiteljima.
- Moreju ti dite poslat na repeticije da dodatno trošiš šoldi. Znate vaše dijete nije dobro savladalo gradivo. Pa ca je cini u škulu, ako ni dobro savlada gradivo?
- Opet ti. Pustimo učitelji na miru.

PAŠKI SIR I OZNAKA IZVORNOSTI

- Nego nisi mi ništa reka za sir.
- Ne znan na ca pucaš? Paški sir je sada dobi oznaku izvornosti i ta oznaka se mora jasno vidit na svakon siru, to znači da naljepnice na siru više nisu potrebite, pogotovo one sa čipkom. To mislim na "paški sir", svi oni drugi sirevi nisu paški, pogotovo ne oni od kravljeg i kozjeg mlika. Tako da ti drugi nisu ni zaslužili da nosiju čipku na sebe. To Ti sada javno govorin, a znan ja di si Ti opet usmjeri ovo pitanje.

- To san sti Bebiću da receš. Neka je "paški sir" konačno paški sir u celon svitu i neka svi znaju od kuda dolazi.

- Vidiš kako Europska unija brine da sirarima na otoku pomogne i u financijskom delu, jer nećeju više morat štampat te naljepnice, a verujen da to ni mali izdatak.
Bilo je još jako puno toga ca smo dotakli, ali ki bi o svemu pisa. Sve on zna ca se doli dogaja, pogotovo od kada je instalira Fejsbuk. Ne kaliva se više od tog Fejsbuka. Baš mi je drago da se koristi društvenim mrežema, tako se to danas rece. U tom smo se ozračju i rastali. Geda san ga kako pasiva preko Korza, koda je Riku oslobodi. Lipo je sa njin se družit.



Post je objavljen 02.12.2019. u 18:01 sati.