Marketing
Malo i veliko
Kad se doma pokvari špina, onda neće stat samo na njoj.
Tako se i nama, odma nakon špine, pokvarija vodokotlić. Pa iza njega i drugi. I bojler kapa. Čudo od toga u šta sve triba uložit. I još teže, organizirat meštra da dođe u Valu na kraj svita. Sva srića da se u malin mistima svi poznaju. Tako san brzo došla do kontakta. A onda i do meštra.
Lova iskesana. Pokvareno popravjeno!
Kako san jedinica, nisan se nikad gužvala u prostoru. Kad san živila s roditeljstvon, u Gradu san uvik imala sama svoju veliku sobu.
Kad san se udala, opet smo u Njegovih imali dosta mista za Njih, nas i dicu.
A ovdi na škoju iman sobe i katove. Koje i van sezone služe za metenje i čišćenje. Luftanje i održavanje. Pa se onda veliki dil zarade preko lita opet vraća u kuću. I tako u krug.
Ne samo da iman sobe i katove, nego iman i cilu Valu. Nigdi tisno. Svugdi obilato prostora.
A apsurd je tija da ja, za živit u četiri zida, volin male prostora. Ono, baš male, male. Šesno uređene. Imat samo ono šta se triba. I da to sve stane u sitno kvadrata. Neimat milijun pjata, teća, čaša, bešteka, lancuna, šugamana i svih drugih trica i kućina.
E, da je u nas tako mini stanje, kad san pala u banju, banj mi sigurno ne bi bija velik ka ovaj. Di san se prostrla cilon dužinon i širinon. Nego bi bija malih gabarita. I ja bi se posklizla, al ne bi imala di otrest. I nabit se ka žuti.
To je tako kad me Stari ništa ni pita kad je gradija. Slidija je svoje vizije. A da je zavirija zericu u moje, sad bi živili u lipoj pojati. Di bi se moga pokvarit jedan vodokotlić. A ne osan, koliko mi ih se još priti. I malo manje od toga frižideri, špakeri , televizori.
Nikad, baš nikad mi ni pitalo ičega puno. A dopalo me obilato.
Eto, ponekad baš živimo kako ne želimo. Izbace nas okolnosti van vlastite orbite i putanje.
U kojoj bi brodili i osjećali svoj komoditet zrelih godina. i nadasve vlastiti izbor.
Ipak, volin ovo veliko plavetnilo koje mi se podastire u svoj svojoj punini.
Kako na zemji, tako i na nebu.
Da ne ispadne da ležen ono o malin kvadratima.
Post je objavljen 22.10.2019. u 14:43 sati.