Pregled posta

PODUPIRANJE KULTURON

Korzo puno vatrogasci, vježbaju, svu moguću opremu su donili na Korzo. Govoriju mi da je to tradicionalno i da se već dvanajst godišć održavaju ovi susreti vatrogasaca. Kako ja na to nikada nisam potrefi, a niti mi moji vatrogasci, sa kima san svaki dan, nisu rekli. Vidin tamo i Hinka, zapovjednika riječkih vatrogasaca, cera smo bili zajedno ali ništa ni govori da je sutra vježba na Korzo. On neda mira da gremo ća, a ni Mateu se baš ne stoji previše na Korzo, već je pocelo i škropit.

- Ajmo ća, koga Boga ću ovde stat u ovaj šušur.
- Ca ne vidiš da nima nidi mista, di ćemo sest.
- Nać ćemo mista ako se maknemo, ako budemo ovde stali, nećemo nikad mista nać.
- Ala, ajmo nać mista.
Pasivaju novinari, fotoreporteri, mašeju, pozdravjaju, on me bledo geda, ni mu ništa ćaro, ali smo uspili uvatit mista u "Malo kafe".

- Sedi tote u kantun, tu Ti Obersnel obično sedi, pa da se malo čutiš ka gradonačelnik.
- Aha, pocelo je!
- Moran Te malo potaknut.
- Ca su užgali špaheri gori na Čavle.
- Nima dimnjaka iz koga se ne dimi. Ja fala dragon Bogu sa tin niman problema. Ja se grijen na plin.
- Zato si ti bi kontra onih ca su protestirali kontra terminala na Omišlju.
- Terminal je skoro gotov, a oni su puhali uvitar, sve in se tornalo u obraz.
- Opet si sve laži napisa, ali ću ti ovaj put oprostit. Ivo Pavina je napisa novu knjigu, vidin da ga dižeš u nebesa. Iako Ivo dobro piše.

- Kupi knjigu kada pojdeš u Pag, ca je to za Tebe i lipo će Ti se kućna biblioteka popravit. Ja znan da si Ti čita samo stripove, jer govoriju da je strip, knjiga za nepismene.
- Vrag Ti neda mira.
- Vidiš Ti moj kumpare ki smo mi grad. Ako očeš da se ca zna o gradu, moraš se uvatit za svoju tašku to lipo sve izfinancirat i još će ju te svi zipjucat kako si mujen. I kako da taj grad pojde naprid? Ca kultura znači tome gradu? Pred neki dan čitan intervju sa ministron turizma u Novom listu ki je reka da je kultura važan motiv za dolazak gostiju u Hervatsku. Vo lito san dva put bi u Novaju u muzej, pervi put kada je bila postavljena izložba "Riznica srednjevjekovnog Nina" i drugi put kada su organizirali izložbu slik "Ćutin otok svoj". Kada se pružila prilika da vidiš to bogastvo na svom otoku, kako san moga to preskocit. Izložena su bila remek-djela zlatarske umjetnosti.

- I onda u toj Ivovoj knjigi moreš pročitat govor ondašnjeg paškog gradonačelnika Borka Oguića, na otvaranje izložbe paške čipke u Zagreb, ki je reka da će uložit maksimalne napore da se pomogne obnovljenoj Čipkarskoj škuli u Pag i da će prenamjenit prostor u Kneževom dvoru, i osigurat uvjete za Muzej paške čipke. Je Ti znaš di je taj muzej? U ki muzej u Pag bi postavi onu izložbu iz Nina? U Knežev dvor?! Glavno je koludrice napadat.

- Jebiga, ja to ne gedan tako ka ti. Ja stalno mislin kako za sve triba šoldi a da mi nismo baš tako bogata općina.
- A, podrža si me kada san Ti reka da osansto ijad kun hitit u vodu za nogomet je sitnica, a za štampat knjigu bilo Ivovu ili bilo koga drugoga se nima šoldi. Još će ju ga napadat da je injorant za šoldima. Štampaj Ti knjigu recimo o Pernjavicama pa ćeš vidit kako ćeš bit injorant za šoldima. Umisto da grad podrži svaku takvu akciju ka će promovirat jedan grad u kulturnom smislu, u Pag će te stavit na ruganje. Ki razumi da je to je bogastvo jednog grada pa makar koštalo više i od nogometa.
- To imaš pravo, jer znan koliko je to posla kada smo štampali knjigu za naš klub, da Ti posli daju neznan koliko šoldov nikad ti ne moreju nadoknadit svo ono vrime i trud ki si potroši dok se to odštampalo. Ali, covik je opet zadovojan da je nešto ostavi iza sebe. Zato si dobro reka da te triba neki poduprit da to stvoriš.
- U Pag te očito nima ki poduprit. U Pag su karte promišane i podiljene i jušto se zna ki će dobit partidu, a bez briškule u rukamin, partidu ne moreš dobit.
- Ca sport ni kultura?
- I te kakva kultura, kumpare moj. U toj kulturi sudjeluje celi svit i svi se boriju da taj del kulture dovedeju u svoj grad, u svoju državu. Zato san ja kuntenti da u Pag tako dobro djeluje nekoliko dobrih športskih klubova, od ovih veslača, do ping-ponga, ribolovno društvo, pa na koncu i nogomet. To je dimenzija više jednoga grada. Jesi vidi kakvu su knjigu napisali za 50 godina rukometa u Riku, bili smo zajedno na promociju, jesi vidi ka je to svita i ki judi su bili na tom predstavljanju. Sve riječke sportske legende. To je kultura dragi moj. Jesi vidi di je FIFA ovogodišće organizirala dodjelu nagrada za najbojeg nogometaša, u milanskoj Scali u hramu kulture u Italji.

- Bi san ja i na promociju tvoga Vodiča u gradskom poglavarstvi i tamo je bilo judi iz sporta i iz kulture i bi san kuntenti.
- Pusti sad to. Ajmo pomalo doma na ubed.
- Cekaj nisan Matea pita kako mu je u škulu. Mali, je borša teška?
Mateo se samo nasmija, on je bi u svon svitu, geda je vatrogasci i kucini ki šećeju po Korzu. Više ima kucinov nego judi. Govoriju da je i to kultura prema beštijama. Neka beštija, niman ja ništa protiv njih, ali ca je previše, je previše. Tako smo se oprostili, ovoga puta je sedi u miru, čuha me je ca govorin i bi je zadovojan sa susreton.



Post je objavljen 29.09.2019. u 16:34 sati.