Pregled posta

CETIRI MISECA

Samo san ceka taj tren kada će me napast. Do sad je muca, ali se vidilo na njemu da mu nešto ni po voji. Jutros na kafu na velu pijacu je otvori dušu.

- Cetiri miseca je pasalo a da ti nanka besede nisi napisa o meni.
- Nego da ja Tebe najprije pitan: ca ti po vome vrimenu ciniš u Riku?
- Očeš da ti recen?
- Ca cekaš.
- Cekan ti ženu.
- Baš lipo od Tebe, baren je u sigurne ruke.
Vidim da je užgan pa neću više dolivat vodu na uje, jer bi mogli intervenirat riječki vatrogasci, zato je boje okrenut na valcer da se nebismo pokarali pred judima, a on kako vice i ovako i onako svi gedaju u nas.
- Razumi san, doni si šoldi doma na sigurno da Ti slučajno doli ne propadeju.
- Ca tebe briga za moji šoldi.
- Ni najmanje, zato više nećeš bit na mome blogu. Drugi plačaju da se o njima piše a ja ću Tebe badava mećat. Bome neću više, jer Ti nanka kafu ovu nećeš platit.
- Jebi se ti i kafa, boje bi bilo da smo popili bićerin prije ubeda.
- Moga si, ki Ti brani.
- Ala, popimo bićerin radi mira u kući.
- Ala, popimo.
- Ca ćeš ti popit?
- Ja ću jedan činar sa sodon i ledon.
- Vidiš, ni ti ni ta loša, moga bi i ja jednoga kao aperitiv. Nisi ni Ti mujen Bebiću:
- Koliko put si mi to već reka?
- Sto put i još ću ti sto put reć, a ti se juti koliko očeš. Opet pišeš o karnevalu i dižeš svoju generaciju u nebesa, tobože da ni vas da nebi bilo ni karnevala, pa si Bakiku i Grujicinku diga koda samo one postoje.

- Vidi san ih kaj mora od Tvoje generacije na pijacu. Jedva san i Tebe vidi. Dobro si reka da je pol Tvoje generacije već u sveti Karen, zato mi dajemo sve od sebe. Jesi nas vidi. Njih dvi peceju pandešpanj i štrike, ja slikivan da ostane za povijest, Peca se još maškariva. Malo nas je al nas ima.

- Drago mi je da deržite do običaja i da ste dicu tome navadili. Vidi san kao je Mateo kola, samo još ni nauci korak.
- Pomalo, naucit će. Vježbali smo malo doma. Da vidiš kako mi unuk piva bomba i on je već zaluđen kolon.
- Vidi san ti ćer i zeta sa dicon u Pag. Mali je odličan, vidin da je jako živ.
- Fali mu samo barba Mateo doli pa da budeju kompletni.
- Ki barba Mateo?
- Moj sin.
- Kako Tvoj sin?
- Ca mi Tamara ni ćer kako si reka. Pa ca je onda Mateo tome malome?

- Vidiš a ja deržin da su brati. Vidiš kako ti to u životu dojde. Da ne zaboravin ti reć, nisan zna da je ona ženska ca su je ploču stavili na kuću od Zeca, Paškinja. Nikad nisan ni cu za tu žensku.
- Da nimaš mene, puno Ti toga o Pagu nebi zna.
- I to je isto istina. Da te pitan prije nego ca gren doma, ca ti govoriš za ovaj šušur oko nogometa doli, ti si bi član skupštine rječkog sposrtskog saveza, pa znaš kako se šoldi diliju.

- Ako je istina ono ca je gradonačelnik izjavi u novine, da se tote radi o osansto ijad kun, onda je to brate moj za razmislit. Moji Zamećani, a igraju prvu hervatsku ligu u rukometu su prošle godine dobili šestopedest ijad kun, a ni za uspoređivat. Ni meni krivo da oni dobiju toliki šoldi, samo ca to moraju opravdat nekin rezultaton. Reka bi da ovde ni tako. Vidiš a za vridnije stvari nima se šoldi. Da su napisali monografiju o paškon litnjen karnevalu sve skupa bi možda koštalo do trejset ijad kun i ostalo bi kao trajni spomen. Zato se nima šoldi. Nikad se u Pag ni imalo šoldi za ono ca je bila trajna vridnost, jer da je to skupo. Itit toliko ijad kun u Julovicu bez ikakvih rezultata, to ni problem. Osjeti san ja to na svojoj koži više put, od Horizonta, do Lokunje i da daje ne nabrajan.

- Tako je Bebiću. Nisan ni ja kontra sporta i neka gre sport naprid, ali triba sve to i kontrolirat. Ca misliš da su Novajci samo tako stavili svoj nogometni klub u okvire ke moreju pratit, a i Brazilci su igrali za Novaju.
- Jušto tako.
On inače ne more stat više od pol ure na jedno misto. I dok smo čakulali, pet puti se je diza, govori da gre ća, pa bi opet se, pa me svaku malo sa nečin podbo. Reka san mu da kada bude platit da će dobit novi post. Onda se još više navi, još više je govori i protiv HDZ-a i protiv Jadrolinije, jer je mora cekat filu za doć u Riku, a tamo mi žena radi, koda je meni žena direktor Jadrolinije. I tako nikada kraja. Bit će kunteti i odma će me zvat kada pročita i kako svaki put će reć: moga si cakod i istine napisat, a ne sve laži.




Post je objavljen 19.08.2019. u 10:35 sati.