Pregled posta

PROLIĆE JE, A U MENI NEMIR

Proliće se ćuti na svakon koraku. Grad je pust. Ne daži, baš je lipo ugodno da se more ucint đir. Nidi ni žive duše. Po Korzu šečeju sportaši ki danas gostuju u Riku a od mojih kompanjona za kafu i čakulu ni traga, ni glasa. Neke zoven telefon čak su i telefone isključili. Bome lipo, i ja ću isključit telefon pa kada zoveju neka vidiju da i ja mogu isključit telefon. Mateo me tira neka gremo u robnu kuću RI kupit mu neke slamke za pit. Ajmo ća to kupit pa ćemo pomalo nakon đira i kada popijemo kafu poć doma. Nismo ni ušli u robnu kuću kada telefon zvoni.
- Ca je, di si, nisi moga doć do grada?
- A, di si Ti šejanine, ja već pol ure šećen a nidi žive duše.
- Bi san klapunićov nabrat.
- Lipo od Tebe, pa ćemo doć na buzaru, ja ću donit botiju vina. Već pol ure nas dva šećemo po gradu i nidi žive duše, već san misli da si i Ti poša apartmane poredit.
- Ne pripovidaj previše, nego dojdi cekan Vas na kafu.

Nakon što smo obavili kupovina, gremo nas dva na kafu, jer i Mateo pita:-kada ćemo na cugu?
- Ca je antifašista dosadno Ti je doma, ili nisi moga odolit?
- Ne, nego volim čuhat tvoje gluposti, ca Ti nisi antifašista?
- Sigurno da jesan, Ti znaš da su članovi moje fameje dali i život za slobodu.
- Ki su to članovi tvoje fameje dali život za slobodu, koliko to ti članova fameje imaš?
- Sto put san Ti već reka, brat od moje nane Lučinke i njegov pervi rojak Bakac od Jure i i barba Berne brat. Samo ca njima nisu digli u Pag spomenike, niti ulicama dali imena pa ih se niki i ne spameti.
- Nisan to nikad cu.
- Zato tako i govoriš. Na Dan boraca bi ti kod pokojne nane Telerovice došla teta Fume Dadinica i od Dragana mat ca je smanon svira, Marica ca je bila posli za kapetanon Marcon, donili je dva garofula, cervena naravno i tako se odužili materi palog borca. Lipa gesta, ca Ti se cini?! Život, za dva garofula, pa Ti meni ca govoriš.
- Ca ni danaska tako isto?
- O tome neka Ti govoriju oni ki su u ratu izgubili nekoga. Vidi san da su na Bašacu članovi SDP-a položili cviće i užgali šterike onima ki su dali živote a tamo ih je samo troje.
- Ca si ti protiv toga.
- Bože sačuvaj, meni je krivo da se onako odnose prema onome spomeniku. Mi koda ne shvaćamo da je svaki spomenik obilježje jednoga vrimena pa kakvo god ono bilo. Zac to ne održavat, zac to ne sačuvat? Pa to su Pažani, judi našeg grada i triba ih štovat. Mi smo i lava sa crikve razbili jer da on obilježava vrime ko je donilo samo zlo, a glave tog istog lava moreš nać po paškin ulicama na starin portalima. To Ti se zove ljudska glupost i neukost.

- Kad smo već kod smerti, jesi bi ispratit Morela?
- Nego da san bi. Tri godišća smo proveli zajedno na klupi sa košarkašicama Rijeke. Treba si vidit kako su ga došle sve ispratit i dale mu osmrtnicu, a ne kako košarkaški Savez Rike ki se siti nakon osan dan da je taj covik umra, zato nan je košarka na tako niskin granama. Ne smerdi riba od repa, kumpanjo moj.
- Kad smo već kod ribarije, ca Ti se cini kako su uredili rivu na Katine.
- Ca reć? Bi bi mujen kada bi ca reka kontra. Ono je diglo grad sto posto. Svaki ki ono vidi a pogotovo oni ki su i prošlo lito bili u Pag, sigurno da će ustvrdit da judi ki vodiju grad zaslužujeju svaku pozornost. Meni se jako pjaža, lipo je vidit, još kada bi se maknuli oni ringišpili kod magazinov, bilo bi još lipše.

- Na prezentaciji Nenada Fabijanića san reka da bi to bilo savršeno kada bi se uredilo i dovelo ono da služi narodu kako je arhitekt predstavi. Napali su me da deržin stranu Nenandu Fabijaniću. Covika san nakon prezentacije prvi put službeno upozna, prozborili smo dvi besede, iako san otvoreno tamo reka da neki drugi arhitekta da svoju viziju toga da mene ne bi bilo briga, samo da se ono konačno uredi. Ako je ovo perva faza, toga dobro je i neka samo gre naprid.

- Pa ca se ti napinješ oko toga kada ne živeš doli?
- Eto ti ga na, imaš pravo ja san podrijeklon Pažanin, ca bi se ja oko toga sekira. E, turlavce!
I tako dok smo otvorili sve moguće teme, da san napisa samo koliko smo o politiki govorili tribalo bi mi tri dana pisat. Lipo je sa njin sedit na kafu, on sve prokomentira, sve škvadra, na svaku ima odgovor, ne moreš ti njeg prepasat. Ma sve jedno toliko voli Pag, toliko je ponosan ca je Pažanin, kada projdeju oni ki nas poznivaju i receju nan: -Vi Pažani ste uvijek zajedno, pun je sriće. Nikada nisan doša do odgovora zac mi Pažani ki živemo van Paga toliko volimo svoj grad. Ja san misli da san samo ja tako mujen, međutin kada san govori sa Duškon Paron i on uvik ima samo puna usta Paga. Tribat ću jednon prilikon opet objavit intervju ca smo ucinli sa njin ja i Kaldo dok san pisa na stranicu BNB. Tako smo se oprostili od njega, reka je da još gre na velu pijacu kupit ca mu je žena narucila, pa da će i on doma, ako koga doli ne trefi.



Post je objavljen 07.04.2019. u 21:57 sati.