Pregled posta

CA TI SE DOGODILO ?

Ni racuna da neću doć ugrad, ceka me je kao zapeta puška. Kako me ni bilo a svi su već bili na okup, ni mu vrag da mira a da ne zove.
- Ca Ti se dogodilo, di si zape?
- Danas je takva odluka da nećemo doć ugrad, nego ćemo ucint jedam mali izlet po našen zavičaju. Ima još dosta toga ca nisan vidi, a niti Tea, pa je red da se i upoznademo sa tin užim zavičejem.
- Jebi se ti i zavičaj, nisi moga doć na kafu, da te pitan ki je to od ovi zadnja dva popa ca si pisa, barbi ti Madoni u rodu.
- Nikola Valentić!
- Kako Nikola Valentić? Kako se ti voliš zajebavt to covik ne more verovat.
- Lipo, nana mome dedu Madoni je bila Valentika, sestra od Nikole Valentića popa, je Ti sada ćaro. Nana Kate mi je uvik pripovidala, a imam je i snimanu na kameru, kako joj je pokojna sekerva uvik pripovidala da se tribala udat za nekog Šanta u Velu ulicu, ali da ona nikako ni stila, nego za Madonu i da su je u tome pomogli barbe popi, materini je brati. Sada san Ti reka i grih i grišnika.

- To ni za verovat. Zato je barba Frane Valentić kada si deda isprati iz mrtvačnice u Riku prema Pagu, sta do vas i neki judi su se i njemu žalovali, ali onda mi ni bilo upameti zac je to tako.
- Zato ca su bili rojaci, barba Frančov ded, i dedu mi Madoni nana, su bili brat i sestra.
- Da si mi za mislt.
- Znaš da mi je pacijent barba Ivan Donadić - Delija, pa čakulamo na terapiju i ne more doć sebi kada mu govorin za neke rodbinske veze u Pag. I on se cudi kako to znan. Ca ja znan, uvik me to interesiralo, nešto san zapisa, veći del san zapameti, zato zadnje vrime sve više pišen te veze jer se u Pag sve manje zna i poštiva rod. Znaš kako se u Pag rece: sve do devete kapje kervi!, a mi više ne znamo nanka drugi rod.

- Nego reci ti meni di si to bi na izlet?!
- Na Črišnjevo, tamo Prdela drži oštariju, svi greju tamo, tamo mi i kum ima kaić vežen pa da i to cudo vidin. Ja san zadnji put bi tamo dok je od Črišnjeva vozi trajekt za Kerk, prije nego ca je izgrajen most.

- I ca govoriš?
- Di su tamo komisije za bespravnu gradnju. Zadnji put si me napa da branin Miškovića, tribaš to vidit. Svaki kaić ima svoj mulić i to se na njega potpišeju cigov je da se slučajno nebi veza za mulić. To je strašno kompanjo moj. I nikome ne pada na pamet da bi to sruši. A, mi u Pag odma bageri na licu mista. Zavidni, nevirni, cudo jedno.

- Ja san bi jedan puta tamo, pa smo se kod Prdele zipili ka praci, nisan ni zna ki me je doma dove. Bilo je odlično društvo, Prdela je svira gitaru, pofriga sardele i eto ti zla. Ca ti ni Prdela sused na Čavle.

- Je stoji nidi blizu mene, ali ja ga slabo znan i nisan se zipi tamo, tribalo je Teu i Matea dovest doma.
- Ne sumjan da se nisi naslikiva.

- Ne Tebe ću pitat.
- Da ti se ne dogodi da ovu subotu ne dojdeš dograda, sa kin ću čakulat, ovi talenti samo govoriju o sportu. Već mi je puna kapa sporta i politike, oću govorit o Pagu.
- Ako ne pojdemo na ki izlet, morebit dojden dograda.
- Ne bali više, molin te.
- Neću Pažanine.



Post je objavljen 20.03.2019. u 22:10 sati.