Marketing
Dupla obljetnica
Ovo je bila po puno stvari posebna večer za sve kaštelanske maškare, a posebno mašogradske (iz Kaštel Sućurca, za sjevernjake) ... Nije baš od početka, ali stvarno odavna je običaj da maškare simbolično priuzmu vlast tako da in oni „pravi“ pridadu ključe grada. Iako bi se našlo „zli jezici“ ča bi rekli da bi bilo boje da maškare stalno držidu ključe 
.... ko bi sve učinija kutentima (zadovoljnima, za sjevernjake)
Zašto posebna? Pa zato, za Gospu blaženu, ča mi slavimo DVADESETE obnovljene maškare u najistočnijemu dilu Kaštili, kojega od dragosti zovemo Mašograd
Mučki provokatori iz Zapadni Kaštili su nan čak donili i tortu, kako su rekli, ča je njima pritekla u frižideru od proslave njiove 200. godišnjice 
Bilo je maškarani povorki, naravno, i pri nas, posebno krajen sedandeseti i početkon osandeseti godin prošloga stolića ... da ne budemo mi ka neki političari ča mislidu da se od njiove pojave počinju godine brojit.
Počeli smo lagano, sramežjivo, prve godine smo po pet kun prodavali „Mašovnice“, ka dokaz o „državljanstvu“ Republike Mašograd.
Dogodine se već lagano počeja vrtit „Mašogadur“, prva dva broja umnožena na fotokopirnoj makinji, a 2003. je već jema kolor koricu ... pomalo, biće još vrimena za priču o svemu, poslin povorke ... a ja se već zalaufa
Najpri smo, ka ča je i red, odradili službeni dil ... priuzeli smo ključe, naš priocidnik Marin
i „njiov“ Miljenko, pari mi se da jema veći staž od Mao Ce Tunga, uvik je u maškaran, okad znan za se ...
... onda se okrunila velika ...
... i mala krajica krnjevala Zapadni Kaštili ...
Ove godine smo mi, po prvi put jemali svoju Kraljicu ... koja se nije dala smest, nego je odma potla krunidbe išla u prijateljski posjet američkin kolonijan kod Trumpa
... a poslin jon nisu dali mira jerbo se svak tija sa njon slikat ...
Bilo je dosta maštoviti kreacija ... ka ovi Čegevara by @pechina ... ali nažalost i on je izda revoluciju i podlega čarima globalizacije ... nije mu baš „Plavac mali“ u rukan ...
Ova slika je puno zanimljiva i teška za uvatit ... jerbo sva tri na njoj, jedan i drugi Mario, ka i oni Čegevara ča viri odizad, pljucaju po društvenin mrežan i nima ti pinez da učinedu svoj profil. A sve znadu!
Jerbo viridu ženan priko ramena kad one surfaju ...
Ovo šoto je klasični spoj mladosti i iskustva, skupno i pojedinačno ...
Nakon obaveznoga dila neki su se nastavili zabavljat uz dobru mužiku našega Verige ...
Dok su se drugi povukli na bilateralne i trilateralne razgovore ...
Kako bilo da bilo, mora san napustit veselu ekipu oko deset i po, jerbo je Vinkici triba brzo završit „Ples osmaša“ pa je pape triba glumit „Uber“ ... Ne tužin se, taman posla, ionako san i sam bija na rezervi pa bi uskoro lagano odjaha na zapad sa mojon Kobilon Suzi (tm)
Sutradan, nakon ča san dobro odmorija (too old for this shit!¨) i obidva, bili smo Zakonita i ja učinit malo spize, taman da se na povratku popenjemo na taracu naše kuće vidit kakovi je pogled odozgar ...
,,, i da zabilužin Mašograd u zalasku sunca ... jedne nenormalno teple veljače (15. stupnjev, bija san u kratke rukave ispod jakete)
Biće skoro još materijala, skupljadu se slike za Mašogadur, čini se povorka ... a red je da sad, makar na kraju, objasnin ono „Duplo“ u naslovu
OVO MI JE POST BROJ 800 NA BLOGU!!!
Zdravi i veseli bili! 
Post je objavljen 10.02.2019. u 23:15 sati.