Marketing
ADIO KUMPANJI
Cujemo se nas dva skoro svaki dan i sve rastresemo i ono ca se ne bi smilo nikada napisat. Vriđamo se i beštimamo ko najveći razbojnici. Sam sebi se ki put cudin kako me povuce, pa mislin da je on kriv jer me je nažga. Ma je, kriv san sam ca neznan stat.
- Di si nesta nakon kola? Gedan po Korzu, pa pitam kumpanja:- di ga je vrag poni? Sigurno se dikod sakri i slikiva. Ni moga poć ukolo, ca glumi da je bolestan.
- Ma je, za kolat sigurno nisan bi, a pobiga san na otvaranje izložbe slik u galeriji "Principij" di je gospodin Borislav Ostojić novinar Novog Lista otvori izložbu svojih slik. Nisan to moga prepustit.
- Ajde budi iskren pa reci dvi besede za paški karneval na Korzo.
- Prvo moran čestitat svima onima ki su došli odozdola, ki su dali svoj trud da baren malo paškog karnevala osjetimo na Korzo. Branku ki žive za karneval. Ku forcu taj čovik ima. Ali, dragi moj ako je ono sve ca su Pažani pokazali na Korzo, onda je to jadno. Di su bile mišnice?, di je bi paški tanac?, di je bi baren del "Robinje"? I znaš ca, neću ja više ništa govorit i ne tentaj me da uvik govorin kontra. Di su bili predstavnici gradskih vlasti? Lipo je bilo bit Pažanin onu vecer na Korzo, ali gosti ki su bili na Korzo bili su prikračeni za ono ca cini tradiciju paškog karnevala. Znaš da san svima govori kako će Korzo bit puno narodne nošnje, kako će se kolat tradicionaln "Paški tanac", kako će se pokazat baren del "Paške Robinje". Ništa od toga nisu vidili oni ki su fatapošta samo radi toga došli. Uzalud je meštar Toni govori da je paški karneval jedan od najstarijih karnevala u Hervatskoj, kada Pag ni pokaza sve ono ca ga cini posebnim. Eto, to Ti je moje najiskrenije mišljenje, iako je moje serce onu vecer bilo veće od gradskog tornja.
- To san ceka Bebiću da receš.
- Zac mene cekaš ako isto to znaš i Ti.
- Zato ca san misli da ćeš napisat ku besedu o tome.
- Pa da mi receš ko i prošlo godišće:- samo se ti nadaj da ćeš dobit vez na Katine budeš tako pisa.
- Di ćeš onda vezat kaić?
- U Veli Bok, tamo je najsigurnije, najlakše je doć auton tamo i ne moran platit parking.
- Pročita san da si se oprosti od Elice. Vidi san te ovo lito kada si čakula je sa materon, ali nisan zna da ste zajedno hodili u razred i da van je Marija bila razrednica.
- Vidiš kako sudbina oće i kako se igra sa namin. Moj kumpanjo, moja generacija se pomalo seli u vječnost. To su već tri na onoj sliki kih više nima meju namin i to mi daje za mislit. Ca je život nego fantazija. Zato je moj pokojni otac uvik piva: - uzmi sve ca ti život pruža, danas si cvjet a sutra uvela ruža.
- I to je jedna vela istina Bebiću moj, ne moremo od toga pobignut. Je Mateo boje?
- Je boje mu je, bili smo na kontrolu i Dean je reka da bi moga pocet sa kruton hranon. Padaju mu zubi pa kupimo šoldi. Stavi zub pod blazinu i ceka ca će mu zubić vila donit. A, donese mu uvik šoldi i onda je najkuntentiji.
- Nisan te ni pita, jesi ti sada boje?
- Boje san i poce san radit, samo za tri miseca moran ponovno slikat pluća da vidimo kako to izgleda, je se ta sjena povukla.
- Svako jutro rokni jednu travaricu i to ti je garancija da ćeš bit zdrav.
- Jušto tako kako Ti govoriš, pa ću za ko godišće bit u noći muzeja eksponat za razgledavanje ka mumija.
- Ca sve tebi ne pade napamet. Ala, cuvajte se pa se cujemo.
- Cuvat će mo se. Bog!
Post je objavljen 03.02.2019. u 20:08 sati.