Marketing
GRIPA
Sve je bilo spremno za doček Dondolaša a ja u postiju. Fibra skoro cetrdeset. Mateo i Tea se paričivaju da ih docekaju, a ja doma umiren. Dugo me već ovako ni strefilo. Ni dobro. Celu nediju san u postiju.
- Je Ti ca boje?
- Ne moren reć da mi nije boje, ali sve jedno me doktorica šaje da slikan pluća i vadin kerv.
- Pasat će, na mlado je.
- Samo Ti zajebavaj.
- Je se Mateo parićiva za operaciju?
- Sve je ucini, sada ga samo još anesteziolog mora pogedat.
- Ala, neka se više libera toga, bit će i tebi lakše, ovako si stalno po doktorima derca sa tin malin.
- Ja se to isto nadan.
- Ja san misli da ćemo poć u Lovran a ti doma.
- Vidiš kako će ispast da samo govorin za karneval a kada triba mene nima nidi. Ca ucint? Da je Mateo zdrav zadimili bismo nas dva makar jedno kolo ucint i slikat. Ovako će on dan prije bit operiran. Ceka je i on to i sto puta me pita da di ćeju užgat "Marka". Njemu je to najvažnije, da Marko gori. Objašnjavan mu da nećeju užgat Marka, ali mu ne gre uglavu. Morat ću organizirat da zadnja tri dana karnevala budemo u Pag.
- Bilo bi to pametno.
- Ako bude zdravja može se lako dogodit da to ucinimo. Sada je samo najvažnije da se u Lovranu dobro zabave i da judima ovoga kraja, u cijin venama tece karneval pokažeju ca sve paški karneval znači.
- Bilo bi lipo da možeš poć, a vidiš kako se dogodi. A, zdravje je ipak najvridnije na svitu. Vridnije od svih karnevala.
- Jušto tako, ako Te bude voja mašakarajte se Ti i žena i odite se u Lovran zimunješat.
- Sve jedno pišeš. Vidim da si doša blizu trejset Pažaninov. Za neke nikada nisan cu. Lipo je znat da su ti judi bili Pažani i da su toliko volili svoj grad.
- Smoje kad je poša u penšjun kako je govori, je isto tako zapisa da će ka penšjunat svaki dan napisat dvi tri rige i da će za tri cetiri godišća imat roman, jer novinar mora svaki dan napisat tekst za novine. Tako i ja sa ovin mojin Pažanima. Malo pomalo i vidiš di san doša.
- Svaka ti čast. Cut ćemo se. Cuvaj se!
Post je objavljen 20.01.2019. u 15:36 sati.