Marketing
POCELO JE, POCELO !
Zove me žena. Svaki put kada me zove se pokaramo preko telefona. Kako neću? Uvik samo naredbe, jesi ucini ovo, jesi plati racuni. Sve jedno san je reka da ćemo ja i Mateo poć na Cipicu. Samo hodi pa neka se Mateo razboli. I baš dok mislin da napišen dvi rige, evo ga zove.
- Ca je Dondolašu, pune su te novine, nisi moga odolit da ne pojdeš dignut zvon.
- Je, baš će mene u novine stavit, kakve ja iman veze sa Dondolašima osim ca je Mateo zaluđen sa njima. Docekali su ga koda je već zvončar.
- Ala ne pravi se mujen, koda ne znan da si se vidi u novine.
- Da Ti buden iskren još nisan Novi List danaska vidi.
- Pogedaj Novi List pa mi se javi.
Gren pogedat Novi List da vidin ca to govori i bome u pravu je. Istina je da me se vidi kako slikivan i da bi me retko ki pozna da san to ja, ali se vidi. Gren ga odmah zvat.
- Kako si me onako mašakranoga moga poznat.
- Baš me je interesiralo kako je pasalo na Čavle sa podizanjem zvona i kada san se malo boje zageda vidim i tebe di slikivaš. Ni moglo pasat bez njega i ovo godišće, govorin san sebi.
- Ne triba njima raspisat natječaj ki će organizirat maškare. Dondolaši su na Čavle oni koji imaju svu vlast u ruke, a u Pag je "Markova kumpanija" samo mertvo slovo na komad karte. Od kada se u Pag raspisuje natječaj za organiziranje karnevala, ništa više od onoga karnevala po kome je Pag bi maškarana metropola, kumpanjo moj. U Pag su od karnevala ucinli karneval. Vidiš nisan zna da je za paški karneval važno koj stranki pripadaš, jer ako nisi u našu stranku onda si ili kontra ili za karneval.
- Bogami to dobro govoriš, jer kada se sitin karnevala u mojoj mladosti bilo je najvažnije samo dobro se divertimentit. Glavno je bilo dobro se natancat, divojku nać, pa i zipit se ali sve sa miron. Sićan se tanci i u Domu, i u Smokvu, kod vatrogasci di je danas FINA i na kraju u Belvi. Ki su to bili lipi karnevali, puni smiha.
- Neka i ovo godišće stave onaj šator nad crid pijace pa će za ko godišće govorit da je i to tradicija. Znaš ca je Stipe napisa još 1977. godine. "Di si dični Pažanine, pa da vidiš svoje sime, kako ti se gradom "diči", i na što sve ovo liči. I pitaju se naši ljudi, što se ovo s nama zbiva. Na pijacu svi smo naši, a pod maskon gost se skriva."
- Prorok, ja ti govorin koliko je toga unaprid reka, a svi su ga deržali za kampjuna. Koliko fali takav jedan covik. Samo jedan takav covik, moj Bebiću.
- Nadajmo se da će paški karneval zaderžat baren malo one svoje tradicije radi čega je svit dolazi u Pag, i svi oni Pažani ki su živili u Riku, Zadar, Zagreb, i svi njihovi prijatelji ki su dolazili sa njima zabavit se. Vrime je od karnevala, ne od plakanja. Ovde je već sve parićano za ludovanje, jesi vidi danas tri stranice u Novon Listu posvećene su karnevalu. Neka svit uživa. To je i riceta za natalitet.
- Bravo Bebiću parićat ćemo se, pa ćemo jednu subotu zadimit u Pag, ca govoriš.
- Ni Ti ni ta za hitit. Živio karneval!
- Živio! ala, prekini.
- Neću, prekini Ti, Ti si pervi zva.
- Ajmo na jeda, dva, tri.
- Boooooog.
fotografije izvor: internet i Branimir Maričević
Post je objavljen 07.01.2019. u 22:23 sati.