Marketing
ALI AS SILVER
Ovo djelo je plod fikcije. svaka sličnost sa stvarnim osobama i događajima slučajna je.
Kliknuti na link i slušati originalni izgovor
U ono vrime kad je daržava na bankanotima dinarih brisala dvi ništice da bi od storih dinarih dobila nove dinare duošo je u Molo misto višćun Ali As Silver ča se piet godišć fudrovo višćunstvon u Indiji. I kad je iz kufera poče vadit stvori, oči malomišćanih, skupjenih u soli, su se sve veće širile od merokulih u špetakulu Ali Asa Silvera.
Poče je s gorućon baloticon i stavi je u justa ko pašuratu, a izvadi je izgošenu posli čega se iz zonjega rieda čulo:
„Ovuon namin hoće pokozat da ni stroha da ćemo se ispeć kad gosimo požore“
Onda, kad je izvadi jedon pot i poče lieva-lieva vadit iz njega bankanote raširili su miščani još veće oči.
A onda se u soli ču žienski glos:
„Ooo, da imomo doma takove bronzine lako bi non bilo ploćat struju, vodu, radio, općinu, poreze“, i još je Lukrica dožuntala:
„Ne bi onda onin muoj već govori da darži četiri kantuna od takujina“
Iz pota je onda izvadi nikoliko lemuncinih i kad bi hi pririzo u svakemu je bila bankanota od stuo dinarih.
„ Luka, pitoj Silvera da ti do sime pok ga usod u vartal, izniknit će ti lemuncin s vitaminima i bankanotima“ svitovo ga je Tuoni na vas glos.
Poza žutih lemuncinih pojovi se povar Silverove glovie čarnjeni balun i kad je balun ižbaro na njegovu ruku sletila je bilo golubica, i onda je Ive kašaduru Jerkotu reko:
„Ovako Jerko, kad grieš u kaču vajo pogodit, a ne ko ti kad žbaroš sve se tičice razletidu“
As je pusti da se judi malo nasmijedu na Jerkotov račun, jerbo se Jierko foli u mistu brojen ubijenih prepelicih i žbravaricih.
Onda je Ali izvadi veliku pirju i poče ulivat u nju čorno vino iz butilije, a iz pirje je točila čisto voda.
Malomišćani se već nisu smijali, jerbo su kapili ko da jin Silver govori:
„Vi u vaše konobe morete činit od vodie vino, ko Isukarst,
ma ako ste kapoci učinte vi od vina vodu!“
I tako su malomišćani u zinsko doba lipo i veselo pasali još jedon don.
Autor: Dinko Matković
Autorov blog: Insulano
prošti: Geomir
foto: Geomir
Manje poznate riči:
fudrovo = izučavao
merokulih u špetakulu = čuda u spektaklu
pašurata = uštipak, fritula
pot = lonac
bronzine = lonce
čarnjeni = crveni
ižbaro = puknuo
kašaduru = građevinaru
grieš u kaču = ideš u lov
pirju = lijevak
kapili = razumjeli
kapoci = sposobni
Post je objavljen 03.06.2018. u 22:51 sati.