Marketing
USKERS
Baš san se cudi zac se ne javja, kada jutros odma zoron, evo ga da ne zaboravi čestitat Uskers, i da me zatece:
- Komunjaro doma si, ni te voja nanka dograda doć.
- To si Ti cera ceka filu za frigane sardele na Korzo, ja sam sve parića unaprid. Di ću doć dograda kada san cera celi dan bi u balunu.
foto izvor:Goran Kovačić/PIXSELL
- Danaska ćemo vidit ki je boji u balunu, zato ja tebe zoven, a ne za Uskers, jebe se meni za Uskers.
- Znan ja de Tebe ni briga za Uskers, ali si pervi na pijatu, neće falit ni kuvanih jaja, ni škalonje i rokvice, ni janjetine. Za to je Tebi Uskers, a ca je to uopće Uskers baš Tebe briga.
- Isto kako i tebe. A ca si to cini cera, da ti je dan bi u balunu?
- Posli posla san bi na sprovod na Viškovo, od prijateja Marinka je umerla mat, onda san doša doma, pa san Matea vodi izvadit zub. Sve moguće specjaliste od zubi smo pasali, popi je litre antibiotika i zub mu je celo vrime bi natecen. Dragi moj da si to vidi, nebi verova. Mateu svaka čast. Bi je pravi heroj. Zubar ni moga doć sebi ko je to dite. Govori da ni stariji nebi ovako zdura.
- Čuhaj, a ki ti je to prijatej, je ga ja poznivan?
- Ca ja znan dali ga Ti poznivaš, on derži bravariju na Viškovo, ali mu morebit znaš ćer, to je ona mala ca piva "Potresujku", mala Ivana.
- A, ha to je ona mala Marčelja. Koga ti sve ne poznivaš da je meni znat?
- To Ti znači bit dobar covik.
- Nego da te pitan, jesi se parića za popodne? Na Poljudu će bit preko dvajset ijad judi. Satrit ćemo vas.
- Sportska zanimacija je parićana: kikiriki, slani štapići, bonboni. Živi bili pa vidili. Neka pobjedi ki bude boji.
- Pravi si političar, ovako oni odgovoriju.
- Dugo san bi u sportu, da nebi ovako odgovori.
- Sa Lokunjon si svih stresa. Pred neki dan me ugrad pita jedan Pažanin da ako je istina ono ca pišeš? Ca si nepismen mu govorin, vidi si da je svi argumenti stavi na stol. Koliko se ja sa njin družin i kada god govorimo o Lokunji, znan koliko je on unutra. Uvik mi govori da mu je ta Lokunja okrenula život napak. On je racuna nakon škule doć doma, nastavit svirat sa Ganjašon i svoj život usmjerit prema svome gradu. Ovako je mora poć živit u Vela Luku na Korčulu. Malo njih to zna di si ti sve živi.
- Neću više o tome govorit, niti pisat. Ispada koda ja nekoga merzin ili rušin. Meni je samo krivo ca se judima još dan danas mažeju oci. Jesi pročita ca danas piše u Novon listu?
- Ne!
- Doslovno Ti naslov piše: Na Bašaci luka, ugostiteljski sadržaji, šetnica, plaže.... Ti si covik ki je radi u privredi, pa mi reci koliko vrimena i koliko šoldov triba da se jedan ovakav projekt realizira? I kako da covik ne popizdi, to je ono ca mene muci i za Lokunja i za sve druge laži ke se plasiraju judima. To je ono ca san ja poruci. Ucinite jednu stvar, pa zovite ijadu novinara i pokažite ca ste ucinli, a ne stalno ucint ćemo ovo, ucinit ćemo ono, koda smo mi mujeni a nisu se maknuli daje od Katin.
- To imaš potpuno pravo. Stalno se falimo, a grad uvik isti. Kada vidim ca su sve ucinli u Kerk, dojde mi slabo.
- Mojoj teti nikad ni palo napamet se od Kerka tornat u Pag.
- Ka tebi teta žive u Kerk?
- Materina sestra, turlavce, u Punat i dvoje dice.
- Ja san zaboravi da Ti mat ima sestru i da je pozakonjena doli. Sekerva joj je bila Morika, vidim je brata Iva Morića na Korzo i sa njin čakulan, čak smo i Tebe spominjali.
- Vidiš kako si pametan.
- Bebiću, raščakulali smo se i mogli bimo ovako do sutra ujutro. Sti san samo provjerit dali ćeš doć dograda, ali kada ti je Mateo još tako sa tin zubon, boje da si osta doma.
- I ja mislin da je tako. Zvat ću te posli utakmice, pa ćemo nastavit sa ćakulon. Je se slažeš?
- Slažen. Bog.
Post je objavljen 31.03.2018. u 14:38 sati.