Marketing
FURBAĆON
Zna san da derži nos na mene, baš me briga i za to. Gren mu se javit da vidin kako diše, da ni na aparatima.
- Ca je Bebiću, još san živ, ni vrag da ti se ca dogodilo kada se ti javjaš, morebit su Titanika digli sa dna pa meni pervome javjaš.
- Ni Titanik ali ni ni boje.
- Kako more bit dobro kada vidin ca ciniš. Krivo mi je da više nećeš dizat te stare slike, a vidiš par slik ke su digli na taj Fejs sam misli da je to neki drugi letrata sve dok se nisi potpisa. Nakon ca si se potpisa, te slike su nestale sa Fejsa. Ki smo mi lupeški narod.
- Da si vidi gospođu u Bijađovu butigu kada san je reka da ova slika ca je visi na zid, da je to moja slika, samo ca ni zvala policiju. Moga san radi svoje slike sveršit na policiju na ispitivanje zbog uznemiravanja prodavačice falšog zlata.
- To si dobro reka. Ja neznan ca bi ucini da san bi na tvon mistu, ja ovako živčan verujen da bi je tu sliku izguli sa zida.
- Samo ti zajebavaj. Vidiš ki si furbaćon i kako voliš tentat.
- Nema to veze sa furbarijon, Bebiću, nego sa onin ca je moje, je moje. Pustimo te slike, imaš pravo i ne diži više nanka jednu sliku gori. Nego da te pitan:- jesi nabavi knjigu od Iva Škofunara?
- I pročita je već.
- Ma Bogati, kako si doša do knjige?
- Tea je bila kupit kod Renca.
- Vidiš, zaboravi san da je Tea doli. Pa ca ti se cini?
- Vidit ćeš ovi dani kada napišen post, pa ćeš mi se javit.
- Vidi san da si bi Sonji na sprovod, nisan nikako moga onaj dan doć. Javit ću se Štefanu kad pojden u Pag. Bilo je tužno za vidit, ali priznat ću ti pervi put da si dobro odradi taj posal.
- Osjeti san da je to moja obaveza najprije prema Sonji, jer smo celog života bili zajedno, pa onda za Damira i ćer joj, pa na koncu i za Štefana, Milku i Barbaru.
- Lipo od tebe, Bebiću. Sve više te u Pag čuhaju ili čitaju kako očeš, vidiš da je Vijola dobi nagradu. Sada drukaj za Dodu.
- Reka si mi i to san napisa da ćeš in reć neka greju u fratri kada je koludrica dobila tu istu nagradu.
- Pa ca san fali?
- Bože sačuvaj. Nego nisi mi reka ca Ti se cini za lučicu "Katine"?
- Pa ca meni na celo piše da san mujen ili si mene naša. Ja ti govorin da će te opet zajebat i da nećeš dobit vez u tu lučicu. Vez će se moć samo kupit ispod banka a ti perdi i piši ca očeš. Pa ca nisi ti ucini mulić na vilu Jerku?
- Pa da i jesan, ca Tebe briga?
- Koliko Eura dobivaš za vez?
- Jušto koliko mi je rata kredita za jahtu ca je svako lito vežen na taj mulić. Vidiš kako si zlocest. Sam znaš koliko san pisa ca su mi bovicu svaku godinu ukrali ili uništili za onih misec dan ca bi veza kaić na tiramolu. Još san se skoro jedan put potuka sa Rombonićen i Dudon, jer su mi rekli da oni imaju veća prava od mene, a jednome i drugome na gliseri visi Austrijska zastava. Učesnici Domovinskih mulićov, pa imaju prednost pred drugima. Oni su sve za mulić dali i život ako triba. Pa Ti odi naprid.
- Koji si ti zajebant, umra san od smiha.
- Samo se Ti smiji, a da si bi na moje misto verujen da bi ucini isto kao i sa onon slikon u Bijađovoj butigi.
- Je u Pag još ki zna ki je bi Bijađo?
- Pa ca mene pitaš, to pitaj njih u Pag kada pojdeš. I ovako te ceka sad pred Uskers poć doli apartmani pocistit.
- Ja san se za to spoti, a ne ti.
- Reci svojoj drugarici neka se lipo odmori, jer da Vas doli ceka mlada janjetina sa kumprilima i škalonjon, posli toga lipo hladan gemišt i neka draga dimi.
- Fala dragon Bogu da si i Ti nešto pametno reka. Kako Mateo?
- Ne pitaj me ništa, jer ću škopjat. Da san zna ca me sve ceka kada ga upišen u fantinići, nebi ga nikada upisa. Kada se vidimo ću Ti sve lipo ispripovidat. Stoj mi dobro i cuvaj se, pa se cujemo.
- Kuraja Bebiću, to ti najviše triba. Bog.
- Bog.
Post je objavljen 16.03.2018. u 18:46 sati.