Marketing
DA SE NE ZABORAVI – FRITE - FRITULE
Svi govoriju da su frite tradicionalno dalamatinsko slatko. Živeći od Korčule do Rike mogu svidocit da se na celon tom potezu frigaju frite. Frite su odraz života i tradicije kraja u kome se frigaju. Ca se cudite? Frite se frigaju, a ne peceju. Za onoga ki ni pecen, ni kuvan, ni pametan ni mujen, recemo da je prefrigran.
Beseda dolazi od venecijanskog fritola, talijanski frittella, zato se ni za cudit da se kod nas udomačila beseda frita-fritula.
U vrime karnevala frita je nezaobilazna namirnica. Kad uguglate fritula otvori vam se mali milijun recepata za ucint frite. I najboji su mi oni ki me uvjeravaju kako su frite sa jogurtom najboje frite i najstarije. Nikako se ne mogu spametiti di je moja nana Kate kupovala jogurt za ucint frite. Ili frite od čikulate, od jabuka.
Frite su tradicionalno jednostavno slatko, kao odraz života i tradicije kraja di su se frigale. Kamen i more, malo osušenog grozja ca su nastojali naši stari, tribalo se nać u ton receptu. Mervicu brašna ko se cuvalo ko oci uglavu, malo sukvic, žlica uja, malo vode, malo kvasa, bićerin travarice i puno jubavi naših nana i materi, tvorilo je frite.
Zato frigajte frite da se ne zatere užanca! Obligato su se frigale za veliki blajdani, ali ni karneval ni moga pasat bez frita.
U Pag smo na svetu Katu govorili:
Sveta Kate, kreši dan,
do Božića, misec dan,
frigaj frite, pun badanj,
užgi kuću, pa biž van.
Tako je moja mat na proslavu 50. godišć paškog litnjeg karnevala nafrigala pun badanj frit. Celi dan je frigala te frite, i moren van svidocit da se pored svečane turte, najviše ilo "Madonkine frite".
- Ovaj put su me zajebali, ali nećeju više, - tako je govorila moja mat do zimskog karnevala kada je opet ucinla pun badanj frit.
Karneval bez frit, ni karneval!
Post je objavljen 19.01.2018. u 17:50 sati.