Marketing
SVI SVETI
Ni dobroga do vika, niti zla za koga nima lika, stara je to ruska poslovica, ali san je više puta cu govorit od starijih Pažani. Otkad su se judi rajali na ovom svitu i kroz život letili ne misleći na sebe, ali uvik sa žejon da se stvori nova vridnost, ki put ih je i srića popratila, a u svemu tome doživili su i svakakva zla, i tu ni bilo druge nego uzet ca dojde pod ruke i pomirit se sa onim ca je iza tebe i za onim ca je ispred tebe. Budi ono ca si, jer ki put moraš delat i ono ca nebi sti, jer niki ni sam živi, ne žive i neće živit. Koliko god mislili da smo pametniji od drugih, moramo se naslanjat jedni na druge kako i dervo u šumi ko bi vitar otpuhnu da mu se samo najde na tir.
Danas je dan onih ki su bili s namin, ke smo poznivali i onih kojih smo se sićali po povidanju naših starijih. Ovo je dan kada se moramo spametit te velike procesije judi ki su hodili po ovom našem paškom kamenu, jedna vela kolona kojoj se ne vidi ni pocetka ni kraja, generacije koje hodiju jedna za drugon sa odmakon od 25 do 30 godišć. Red je da im na današnji dan užgemo šteriku i stavimo kiticu cvića, ako ih vrime ni pomelo i itilo u zaborav.
Verujen da takvih judi nima, jer moramo vodit računa da će tamo bit mista i za nas, a oni ca ostaju iza nas morat će vodit računa da sada mi predvodimo tu procesiju koja neće nikada stat.
Nima više štal, ni konoba, malo se radi, sve smo ćimentali, kuće se rivaju jedna uz drugu, i svi negdi derciju, kao da nimaju vrimena ni za sebe. Kada se sitin tih naših starih siguran san da bi oni bili zgubjeni u ovo današnje vrime kompjutera i pametnih telefona.
Počivajte mirno !
I tako, kada danaska mislimo na svih onih ki su se rodili puni velikih nadanja, ki su se mucili da za svoja trudna godišća ispuniju svoje nade i cagod dobroga uciniju za života, dok su bili mladi i gizdavi, puni snage, kako je život hodi naprid bil zreliji i pametniji, pa se na koncu sve više prignjevali zemji ka ih je zvala, ne zaboravimo koliko ih je bilo, koliko ih je hodilo po ovoj našoj zemji, i pošlo u mrak ne tornivajuć se nazad.
Zato upamtimo besede starijih judi, ki znaju reć, da dolazeć na cimitar na zadnja počivališta naših starih, da je tamo sve više onih kih smo poznivali, a više nisu meju namin.
Zato je danaska red pohodit na cimitar da in recemo: počivajte mirno, volili smo vas, i još ste s namin.
Post je objavljen 01.11.2017. u 12:07 sati.