Marketing
URA NAZAD
Svaki put kada mislim da je zaboravi da ja postojim, on se javi. Obično ga potakne novi post na blogu, ali kako se rece:- boje ikad, nego nikad.
- Ca je Bebiću jesi meju živima?
- A, di bi bi nego meju živima. Ca Ti ciniš, kada se spravjaš doć u Riku?
- Posli svi sveti, kada obajden grobi. Ne mogu verovat da je pasalo dva godišća od kada je Mate umra. I,ovo ca si napisa je takva istina da se covik mora zamislit nad svojin životon. Moren ti reć da si mi i da za mislit.
- Ca da Ti recen? Covik je sve lipo reka. Reka je istinu ku san ja potvrdi i sa godišćima njegovih slidnika. Mati se dogodilo da je dva godišća nakon svoje smerti, dobi dva pranuka. Vidiš kako je taj tekst proročanski. Nego reci mi kakvo je vrime doli i ca ciniš.
- Pravo lito Bebiću, još nisan oganj nagori. Preko dana je 25. stupnjeva da ne moreš na sunce stat, još se moreš poć kupat, navecer se pokrijemo dekicon dok gedamo televiziju prije nego pojdemo spat. Danaska je šla i ura nazad, pa ćemo prije u postiju. Ca ti Bebiću misliš za tu uru naprid-nazad?
- Ca ću mislit, nego da je to jedna vela glupost. Vidiš da i stručnjaci govoriju da nima ekonomskih pokazatelja ki bi govorili da se to isplati. Pokojni ded Madona je za mene bi najbolje mjerilo jer je uvik govori da on blagu ne more objasnit da je ura šla naprid. Tako da on nikad ni minja uru na svom leroju. Kako ovome blagu ca vodi svit to objasnit.
- Pravo ti je ded ima. Barba Ive je bi jedan staložen covik. Puno dobroga san ja proša kroz Madonovu konobu. Kako je samo piva, uživa si ga čuhat.
- Vidiš, zato moj ded Madona nikad ni minja uru na leroj, i nikada se ni odreka pisme.
- Ca Mateo cini, kako mu je u vertić?
- Mateo je u problemima. Od lita kada smo došli doma upa je u jednu upalu sinusa, pa se žali da ga i uho boli, zaverši je na antibiotik, pa su rekli kada popije taj antibiotik da će tribat ucint drugi nalazi, dali je na ca alergičan ili nedaj Bože da ni cakod dugog. Kada san ga pove kod specjaliste imali smo ca vidit. I nos, i uši i alergija i eto ti zla. Sve smo to obavili i već su ga ceternaestog narucili za operaciju. Mora operirat treći krajnik i uho. To mu je sve zacepljeno i ako to sad ne riješi moglo bi ostavit trajne posljedice na sluh.
- Vidiš ti kako su ta dica danaska debula. Tamo ti je doktorica paška nevista. Ca ja to tebi govorin koda da ti radiš u Luku.
- Ta paška nevista govori da smo mi rod, jer joj je pokojni svekar Veljko Maržić mome ocu bi vjenčani kum i ona mu je ucinla audio nalaz i pod hitno je stila da ga se operira.
- Vidiš ni to nisan zna. Kada pojden na groblje obajden i Veljka jer smo mi u Riku bili dobri i bi je covik ki je sti pomoć. Samo neka Mateu bude sve kako triba i nemoj da mi ne javiš kako je pasala ta operacija. Bome i ti si u balunu. Onda u Pag nećeš dolazit za mertvi dan.
- Ne mogu. Bit će doli Tea pa će ona poć na cimitar užgat sviću i ponit malo cvića.
- Ako ti ca triba javi se pa ću ja ucint.
- Ne baculaj, ako bude potriba ću Te zvat. Stoj dobro.
Post je objavljen 30.10.2017. u 22:13 sati.