Pregled posta

LABIRINT ULICA NA VODICE

- Pišeš o ulicamin a ti kao stanovnik Vodica, nisi ništa napisa za ono ludilo od ulica doli, pitanje je ako si ti to i vidi?!
- Vidi san, kako nisan vidi, ali ja san pisa o Gradu Pagu a ne o selu.
- Pa ca Vodice nisu del Grada Paga?

- Zamene, ne!
- Ca očeš reć da su ono doli šejani?
- To si Ti reka, a ja ću se stobon složit.
- Ne meči me u smutnju, jer ću ti glavu razbit.
- Ne mečen ja Tebe u smutnju, nego potvrđujen istinu ku si reka, jer za onaj labirint od ulica za ke me zoveš, ne moreš reć da su ucinili građani.

- Ono ni šejani nebi onako ucinili. Jedno popodne san poša ucinit par slik da imam za potrebe bloga, pa kada san doša pred onim cudom, najprije san se poce smijat, a onda san se siti kako pokojnom Stipi Korenu ni falilo tema za napisat "Baš me briga". Ja tome coviku zamiran koliko je on bi bogat glupostima ke su se dogajale u njegovom gradu. Sti san odmah napisat post o tome, ali mislin se, odma ćeju mi reć kao i Ti:- ca ti Bebiću u Pag dojdeš samo smutnju cint, pa san odusta. Sada si me potaka i ja san sebe sa svojon besedon da se i toga dotaknemo.
- Moreš ti Bebiću mislit ca se dogodi coviku ki dojde pred onin raskrižjen i traži ulicu Augusta Šenoe?

- Taj Šenoa Ti je od poznate vodičke plemićke obitelji, od roda Šenoića ili Šejanića, zato Ti nisi razumi zac ja Vodice nisam uversti u del Grada Paga. Svako misto daje imena ulicamin po svojin poznatim judima. Tako smo mi na Vodice štimali Šejanića-Šenou. Vidit ćeš kada toga Šenou izbaciju iz kurikularne reforme, ja ću organizirat prosvjede protiv Jokića da se dira u naše vodičke velikane. Ca Ti misliš o tome?
- Ne moren više od smiha, ki si ti zajebant, jaci si od Stipe Korena.

- Jesi cu da se ki siti toga covika ovoga litnjeg karnevala, koda ga nikad ni bilo, koda nikada ništa ni ucini za svoj grad. Koliko je samo vrimena potroši tičkat na onu staru makinu za pisat. Ca misliš, da on ni zasluži ulicu u Pag ili te Vodice kako Ti govoriš? Glavno da je Šugar dobi ulicu. Na koncu, ki je taj Šugar? Ca je to on toliko značajan za Pag? Je to onaj, ca je dobi apostolski blagoslov od Pape. Ako je to taj covik, zac onda u Pag nisu jednoj ulici dali ime po barba Anti Bošanaru, ki je isto dobi Papin blagoslov i ki je puno važniji za život paške crikve od nekog Šugara.

- Dobro mi je Diogen Šuljić reka da ja ništa ne razumin jer da je on za stranku KDB, pa kada san ga pita ka je to stranka, odgovori mi je Kolan do Belvija. Nisu za to krivi Kolanjci, niti in ja zamiran za njihovu borbu, nego mi sami. Ali, uvik se vrtimo oko istog, samo znamo tlapit. Da Kolanjci speceju dva janjca u Bilinu konobu, doneseju jednu deset kili Gligorinog sira, skupiju "pašku elitu" na domjenak i da predlože da se Vela ulica prekersti u Ivana Gligore, ja Ti garantiran da bi svi bili za to. Glavno se naždrit. Zato imaš na Gligorinim sirima pašku čipku, zato na Dane sira u Kolan, sve Kolanjke u paškoj nošnji sa paškim pokrivacama, govoriju da je to tradicionalna kolanjska nošnja, da to piše u nekim librima, da su tako kolanjke za blajdan hodile na misu, i svi muciju. Kada kome ca receš, svi odgovoriju pa ca si jubomoran njemu je žena Paškinja. Jebi ga, onda odi ti naprid. Eppur si muove!

- Znaš ca, ja ću tebe predložit za gradonačelnika Paga.
- Moreš, kada prominin adresu u osobnoj iskaznici, ne bojin se ja toga izazova, ca misliš da ne mogu izdržat cetiri godišća sedit u gradonačelničkoj fotelji i povest kolo za zimski ili litnji karneval? I znaš ca bi tada ucini?

- Ca?
- Proglasi bi Marašovku, ako Ti znaš di je to, zonom izgradnje jer mi je tamo otac pusti malo zemje da mogu na Bebićevo ugradit kuću sa jednu destak apartmana i sve na trošak građana Paga. Ca Ti se cini? Jebalo bi se meni tad, ca Kolanjke nosiju pašku nošnju i pokrivacu i ca Gligora meće pašku čipku na svoje etikete od sira, pa neka Neda Oros sestra od Stipe Korena, govori koliko god oče, kada oni ki bi je trebali cut, staviju cepići u uši kada žena govori.

- Zajebavaš Bebiću.
- Ne, najozbiljnije Ti govorin, pod uvjetima ke san Ti spomenu.
- Živile paške ulice!
- Živile!
- Živio drug Bebić!
- Živio!
- Živio ADEZE!
- Živio! Vidiš kako voliš ubost i ja moran pasat preko Tvoje zajebancije. Barbi moje matere su skinuli ulicu jer su govorili da je on komunjara. Neka je bi i komunjara, ali je bi Pažanin i jedini je umra u poznatom "štrajku glađu" u Lepoglavi 1935. godine, covik koga su njegovi suborci opisali kao covika ki se bori za socjalnu jednakost. Zato ja oću isto imat kuću sa deset apartmani da buden socjalno jednak sa drugima Pažanima. Zac bi ja mora vozit Golfa starog ceterdest godišć? Zato ću prihvatit ca ćeš me kandidirat za gradonačelnika Paga.

- Bogati, ca bi sti živit ka kraj?
- Žešće od toga, moj kompanjo, žešče.
- Jedva cekan ca ćeš napisat.
- Jesi siguran da ću ca napisat?!
- Nisan, ali mogu predpostavit, jer se ti nebi zva Bebić.
- Onda budi atenti.
- Ne sekiraj se za to, stoj dobro Bebiću.
- Ala, bog.



Post je objavljen 09.09.2017. u 16:51 sati.