Marketing
MAŠKARE, CA MOGU MAŠKARE !
I kolo, i nošnja i paška glazba, sve versti maškar, sve je to bila slika ka je na 58. paški litnji karneval vladala gradon i kada je kraljica karnevala preuzela vlast u gradu od aktualnog gradonačelnika makar na dva dana, ili kako je Branko reka: u Novaju je bilo nakon Daba-Dabo, u Pag je ovi dva dana nakon Fabijanića-Fabijanić.
Sve tada pomunješa, i staro i mlado, i furešti zajedno snamin, ruku pod ruku, vaćaju se u kolo, muž i žena, mladić i divojka, mladi i dica, a na verh pijace naši pivači sa pismom: "Sve maleno pomalenooo…"
Za Pažane je tradicionalna povorka, ka se u ovom obliku održava već više od dva desetljeća, a litnji karneval već 58. godišć, za koga moremo sa sigurnošću govorit da je najstariji na Jadranu, središnji je mašakarani događaj lita, pa smo vidili da su se Pažani potrudili kao domaćini da ca boje docekaju i ugoste svih onih ki će fatapošta doć u Pag, samo radi karnevala.
Paški je litnji karneval, gradski karneval za koga će mnogi Pažani i oni okolo Paga govorit da mu nima ravnog na celon Jadranu od svih litnjih karnevalov, i da je boji od zimskog karnevala. U tom se karnevalu stopiju sve kulture voga svita, i svi oni ki ni neznaju kolat, vaćaju se u kolo kako bi pokazali svoju privrženost toj slobodi. Ki je to šušur po gradu. Svaki škerac je tada oprošćen.
Meni je najviše bilo drago, ca san vidi puno starijeg svita ko je došlo dat podršku, pa makar i seduć na siciju. Prije se špijalo po kantunima, sada se javno pokazuje na sicju.
"Marko" je drugi dan skuri, lipo je bilo vidit da su sa pokojnjakom kako je reka Dušan, po njegovoj žeji otkolali zadnje kolo.
Svi mogući biskupi, popi, i mnogobrojna sve prisutna fameja, ka se naplakala i narikala na svas glas, kako bi svi culi ki je to bi covik od šesta.
Kada smo Velon ulicom u tužnoj povorki hodili prema mostu, di se Marka uvik kremira, reka san don. Dariu da samo cinguli faliju na kavši. Dario mi je odgovori: a zna u Pag više ki ca su cinguli?
I za kraj ono veličanstveno kolo od pijace do rive i nazad, je jedna novost svih onih ki su učestvovali u ovom velikom događaju, ne samo za Pag. Da ne zaboravim, nebi ovo svit vidi da nima moga brata Valtera.
Vesni iz turističke zajednice san reka, da san ja Predsjednik da bi proglasi "godinu karnevala" i da nebi tribovalo strahovat za natalitet. Vesna je umrla od smiha.
I za kraj "Novi Horizonti" na bini, na kojoj su pred 39. godina svirali zadnji dan karnevala, Dušan je ustvrdi da zajedno imamo 236. godišć. I nas ceka sicja.
Tirara ra ra bomba, lipi paški karnevalu
i uz pismu sve to tvoje,
karnevale dobro moje.
Post je objavljen 04.08.2017. u 17:31 sati.