Marketing
VAŽ JE VAŠ !
Bože sveti ki je vo ovako rano ujutro navali na telefon. Cujen da nidi zvoni taj telefon, a ne mogu ga nać. Stavi san ga u kantun punit i zaboravi di san ga stavi.
- Važ je vaš, važ je vaš, važ je vaš!!!
- I neka je i najpoštenije je, a Ti i daje navijaj za "bilu" boju.
- Ne javjaš se ništa koliko feštaš, ali svejedno nisi zaokruži slavlje do kraja.
- Kako to misliš?
- Pa ca se nisi fali da navijaš i za Juventus?
- Navijan, i da cuješ kako Mateo piva:"Juve storia di un grande amore". Još kada Manđo zabije onakav gol, ca će Ti više. Ne moreš uvik dobit sve kako si sti.
- Jesi bi sinoć na užarenoj telefonskoj liniji sa Pagon da cuješ ako ti je kumpanj Matura i naravno HDZ dobi?
- Nisan ja toliko munjen koliko me Ti deržiš. Zato ja imam internet i sve u sekundu doznadeš. Žal mi je da ni dobi moj kumpanj iz školskih klupa, a isto mi je žal da ni dobila neka opcija mlajih judi ki imaju voje rinut taj Grad malo naprid. Ovako čestitan Njekulinu na njegovom izboru za novog/starog gradonačelnika.
- Pa ca si ti star?
- A, ca san mlad. Ca nisi cu ca je sinoć reka novoizabrani gradonačelnik Splita, da on ima pedeset godišć, sti je reć da ima dovoljno godišć da vodi Grad Split, a ja san šest godišć stariji od njega.
- Sada ti je Njekulin sused na Vodice, pa se morete družit.
- Bogami ako se neću učlanit u MODES. Moj preduvjet će bit: prijavljujen se u Pag živit za glas, a glas dajen za parcelu na Vodice. I to ću javnobilježnički ovjerit ka' Petrov, da svi vidiju. Je pošteno, ca misliš?
- Ako uciniš ka' Petrov onda će bit pošteno.
- Vidiš kako se ja i Ti berzo složimo.
- Pustime da se parićan za posal, ovu nediju san popodne.
- Ki ti Matea cuva?
- Cera san ga pove u Istru, ceka ga je pun stup crišanj pa neka ovu nediju uživa u Istru. Bog cujemo se.
- Armada, Armada, šaka jada!
- Kad bi svi klubovi imali takvu navijačku skupinu, nebi se utakmice prekidale ka' u Split po pol ure od bakljade, i onda uvik nakon te bakljade dobijete gol. To je jako pametno.
- Ca braniš Armadu?
- Ne Tebe ću. Mene je Armada zadužila, jer su me počastili sa kapon kada smo se sa Brajkovićen borili za pervaka Hervatske.
- Nisi se nikad sa tin fali.
- Ca ću se falit, ti dečki su znali cjenit ca san ja to godišće cini za njih.
- Odi ća, daj mi mira.
- Bog.
Post je objavljen 05.06.2017. u 12:02 sati.