Marketing
Fešta o' boba AD MMXVII
Ko se sitija organizirat prve „Dane o' boba“ u selu ča je dobilo ime po klapi „Cambi“ 
... Svaka mu čast 
Nemojmo sad pretjerivat, vidi se po meni da nisan baš izbirljiv ča se tiče spize, ali ipak su mi neke vrsti spize drage a neke ... recimo manje drage. Molajmo mi sad filozofska lamentiranja o spizi, ča se mene tiče, bob definitivno igra u prvu petorku. Na bilo koji način, sa bilo kojon spizon, sa janjetinon, manistron, čak i ka dodatak kolačima ... da ne govorin o sladoledu o' boba, kojega san jedne godine jema prilike provat!
Ove godine san krenija ranije ... lani san doša kasno, pa san se mora parkirat deboto kod Giričića 
... zato san ove godine uranija, odma poslin vatrogasnoga natjecanja produžija san do Kambelovca ... Mista ka u priči! Kako i neće kad san doša dvi ure ranije, pa san moga birat di ću meknit Moju Kobilu Suzi (tm). Nakon ča san je uvalija u ladovinu, blizu spomenika Didićima a isprid Veslačkoga doma ... uputija san se lagano na misto događaja.
Pijuckajuć lagano nessicu, gleda san kako se polako okupljaju izlagači, pomalo se dimi iz kazani i veliki teč kod oni ča su spremali na licu mista ... vrime je za učinit đir. Skoro pa čvrsto san bija odlučija ne slikavat ljude, pogotovo ne kako mumaju ... ali ovome dražesnome žiriju, prema kojima su Špiček, Pažanin i Radovan obične lagane prilade, nisan moga odolit ...
Krenija san dalje sa prvobitnin naumom ... bilužit ono ča je bilo u tečan ...
Dugo san izdrža ... ova ekipa sa štanda PGK me zamolila za jednu „spontanu“ sliku. Rečeno učinjeno!
... ali moran priznat da je to više bilo radi ovi „Marijanini Kofic“ ...
... vengo radi boba sa artičokima, iako se ne bi ni kontra nji bunija
Na ciloj fešti san samo „kofice“ okusija. Njami! 
Sva srića da nisan osta duže, inače bi pokusa od svega pomalo! Dunkve, nastavimo „surfanje“ po tećan ...
Da ne bi ko mislija da se sve delicije od boba moredu jist samo žlicon, uvrglave sa perunon ... bilo je ovod i reprezentativni primjerak slakarije sa učešćen boba ...
Još malo čiste klasike ...
... i na kraju, pobjednici ... čuja san da je Tončika (Baletna škola) odnija pobjedu, samo nisan sigur iz koje je od ove dvi teče pobjednička spiza ...
Pravo budi rečeno, mašija bi se ja iz obedvi teče, lipo je izgledalo, lipo je vonjalo ... ali san se suzdrža!
Čestitan pobjednicima, moj dubok naklon svima koji su uzeli učešća u ovoj fešti (eventu, za sjevernjake) ... i nadan se da se vidimo i dogodine!
Zdravi i veseli bili!!! 
Post je objavljen 14.05.2017. u 21:46 sati.