Marketing
VJERNI PRATILAC
Telefon zvoni, ne javja se odma, uporan san, siguran da kada vidi moje ime na displeju od mobitela, da će se javit.
- Ku ja to čast iman da si se ti mene siti, di si bi do sada?
- U Istru, di ću poć?!
- Ca nisi poša u Pag, nego ca se po tujin kućama skićeš?
- Ni meni u Istru tuja kuća, tamo su Tei otac i mat, Mateu ded i nana.
- Znaš ti dobro zac ti ja ovo govorin.
- Aha, sada mi je palo na pamet. Ja san misli da Ti više mene ne čitaš. Pa ca je falilo tome tekstu, svi su ga pofalili.
- Ma i ja tako mislin, i ne mogu verovat od kuda više snage vuceš. Lipo si se načakula sa ton ženskon o Pagu.
- Ma ne moreš verovat, koliku snagu ima ta gospoja, koliko je pamet služi u tin godinama, a kako se svega sića u devedest i šestoj, koda je cera bila u Pag. Tako mi je detaljno opisivala Pag da ni ja nisan odma moga doć sebi.
- Pa ca ima novoga u Istru, ca je Mateo cini?
- Mateo je sa dedon i nanon bra šparoge. Bili smo prošečat do Rapca, nima plaže di se ne kupaju. Turistov svih versti, svih boja kože. Gedan neke stare slike Rapca, pa vidin da je "Vanga" tamo vozila. Sada se moran dat u akciju i napisat cakod za "Vangu". Mi smo uvik mislili da je ona vozila samo prugu Pag-Karlobag, ali ona ima puno veću povijest od onoga ca mi znamo.
- Da ne zaboravin, da te pitan: - ne greš na Rujevicu na utakmice, jer ti se jedini Pažanin ki navija za Riku?
- Bi san na onu povijesnu protiv Osijeka kada su nan ukrali prvenstvo, pa neću više gubit živci za drugu lupeščinu. Misli san da ću Andreja možda vidit u crikvu na misu, pa da ćemo počakulat, ali ga nisan uspi vidit.
- Koga Andreja?
- Prskala, golmana Rijeke, ca njemu ni ime Andrej?
- Pa ca on cini tamo?
- Pa ca si Ti nazad kartami, sto put san Ti već reka. On je sused Tei u Istri, dobar san mu sa ocen i materon, a zaboravi si da mu je barba Mladen bi i moj igrač i pokli trener u Zametu.
- Pa ca mu je Mladen barba?
- Ocev, brat.
- Ni to nisan zna, a kada san dolazi gedat Zameta sa Mladenon san više put i čakula, ono je zajebant samo takav. Vidin da Ti ni bilo dosadno.
- Ni fala dragon Bogu.
- Očeš za pervi maja u Pag?
- Ne moren Ti ništa sad reć, jer Tea ceka da se opet zaposli, pa smo sada u tome.
- Ja san misli da ćeš se pridružit izbornoj kampanji, tvoj školski kumpanj novohorizontovac i hadezeovac Igor Matura će bit novi gradonačelnik?!
- Iz Tvojih usta u Božje uši.
- Nisan ni misli da bi moga drugacije odgovorit.
- Morebit ja pojden u Pag za pervi maja.
- Reka san Ti za koga da navijaš. Pozdravi doma i cujemo.
- Stoj dobro Bebiću i pratin te daje.
Post je objavljen 19.04.2017. u 20:29 sati.