Marketing
Mašogadur AD MMXVII je gotov
Znan, rečete mi vi, uvik ista priča ... ali ne mogu ja tot ništa učinit, to je jače od mene! Ili kako bi Gvozdeni reka "ne more junačko srce izdurat" ... Bija san se jedan put ništo najidija, ne sičan se ni ja više oko čega i radi koga, pa jednu godinu nisan radija «Mašogadur». I kad san vidija ča su učinili od njega, odma san se od muke vratija nazad na posal.
Čuj mene, posal ... ka da san plaćen za to 
Ali davno je jedan reka da su najbolje stvari na svitu – mukte. Tako i slaganje našega godišnjaka od maškar. Zvuči ka floskula, ali isto ću reč: Ovo se radi ili mukte, od gušta, ili nikako. Eto tako, pa ko će povirovat, neka viruje, a onima drugima ionako nima pomoći!
Je li triba napominjat da su mi opet tek pri par dan donili materijal, slike i tekst.
Uvik isto, tako da san prista i grintat. Nema smisla ...
Dva čovika sve to skupidu, napišu, osluškuju, pripričaju ... još nji par dežurni mudrijaši samo dođu i govoru «ja bi vako, ja bi onako ... a kad to nećeš stavit ... tribalo bi». Koji su to? A kad van neću reč, kako bi van kaza moj kum @pechina «raspitajte se»
Isto tako mi je dozvizdilo ronzat na kvalitetu slika. Reka je jedan moj prijatej štampadur da kalman malo (smirin se, za sjevernjake), da to nije monografija ... znan, u pravu je, ali 'beš ti sliku za koju tribaš objašnjavat ko je na njoj, snimljenu na Nokiji od 100 kun.
Tako da san vidija da mi je bolje da za par slika napravit «remake» oću reč poć pa i sam slikat nanovo, nego pokušavat «stručnjacima» dokazivat da ne more mobitel nikad napravit slike bolje od fotoaparata. Nisan ni ja Ivo Pervan, ali toliko bar znan. Eto tako!
Sad, kad je sve gotovo, malo mi je pa život, danas ću se, valjda, rikuperat.
I napunit baterije do ove subote, za predstavu u kinu, i drugu subotu za našu pravu povorku. Moju leteću godišnjicu "mraka" 
Kad god bude doba od maškar, pade mi napamet ona moja subota, 1.3. 2003. godine ... i sve ča se onda dogodilo, i ono ča se nije dogodilo, a moglo se dogodit jerbo smo sve potanko planirali ... samo je Oni Gori umiša svoje prste 
Ali kako bilo da bilo, ono ča je bilo, ne more se prominit ... ne vridi radi toga razbivat glavu!
Do slideće povorke, evo van malo slik od pridlanjske ...
... i od lanjske mašogradske maškarane povorke ...
I, zašto ne, povirite kako je to izgledalo u mraku, 1981. godine, pa smo morali i baklje užižat ...
Svitu moj, vidimo se, najprin u kinu, u subotu 18.2.2017. na predstavi ...
... pa onda u drugu subotu. 25. 2. 2017. na glavnome događanju, maškaranoj povorci koja, ka i uvik, gre u tri ure pozapodne sa pokojne pilane, pa onda priko Gospice, stare kaštelanske ceste i Novoga puta na Veli mul, di ćemo užgat onega (ili onu) ča je za sve kriv.
Zdravi i veseli bili!!! 
Post je objavljen 17.02.2017. u 09:58 sati.