Marketing
IZ TOVERNE MAŠAKARANA POLITIKA IZLAZI
Nakon dugo vrimena javi se je i on, premda su me judi ki dolaziju na ovaj blog pitali, ca si se posvadi sa kumpanjon kada više ne pišeš o njemu. Ma di bimo se posvadili, vrime cini svoje i meje nas svih.
- Ca je di si ti, ca ne radiš?
- Radin, ki Ti je reka da ne radin?
- Misli san da si u penziju poša. Sti san proć dotebe, parića san ti kalendar od penzjonerske udruge pa da ti urucin.
- Baš lipo od Tebe, samo ca ćeš se morat sterpit još osan godišć, toliko mi je ostalo do 65, ako doživen?
- Kada si onda drugu nediju na posal?
- Popodne.
- Pasat ću onda dotebe. Nego čuhaj me ca ima novog u Pag?
- Pa mene pitaš ca ima novog u Pag. Najveselije će bit pred izbori jer onda je Pag pun čakul. To ti je kako i trija na sicju, samo ca moraš imat dobri peščacići jer se lako pomišaju i onda pocme karanje. Ca misliš da su bez veze uklesali triju u sicju?!
- Cu san da su se ovi od Paške stranke već poceli družit?
- To si vidi na Fejsbuk?
- Jebi se ti i Fejsbuk, oli ja gren na te pizdarije. Cu san, judi su mi rekli. To znači da si ti to vidi zato muciš.
- Je, vidi san, pa kakve to veze ima?,neka se judi družiju, ca će drugo cint nego se družit. Znaš da uvik di je bilo slanih sardel da je bilo i judi.
- Najviše u tovernu, di su judi lipo zajebavali, pili i ili i u miru zapivali, bez politike.
- Ni to istina, pokojni ded mi je zna reć da se u tovernama rješavala sva politika, jer da judi nisu ni znali ca se sve u pijanstvu govori. I,evo ti Bože milicionera na vrata od toverne pa se ti misli. Zac su se uvik tukli sa milicijon?, misliš zato ca su od žena govorili?
- Imaš ti pravo, i meni je otac o tome malo pripovida.
- Vidin da se parićivaš za maškare.
- Ne ja nego Mateo. Ivo Madona mu je parića glavu od brava, Frenki će mu ucint "krabuju" i mi moremo partit. Ako bude zdravja u subotu smo mi na Cipici da ispratimo "Dondolaše" na njihov put do kraja ovoga karnevala, neka Mate uživa kad toliko to voli. Već ga cela Grobnišćina zna.
- Da Te uboden za Paški karneval ništa ne govoriš?
- Ja san svoju misiju tamo najpoštenije zgotovi, kakva je bila stranica kada san ja na nju pisa i djelomično je uređiva znaš i sam, i to premda nisan živi u Pag, znači da nisan bi svaki dan u tovernu, nego ovako preko Vas prijateja ki ste mi davali neke informacije i svu starinu da se ne zaboravi pokuša stavit na svitlo dana. Paški karneval ni samo poć se zipit, to je nešto više. Na žalost sve više je onih ki misliju da je karneval samo ajmo se zipit i sve potaracat i zato je boje da me u tome više nima.
- To si dobro reka. Ala, stoj mi dobro pa se vidimo. Pozdravi ženu i bušnuj mi Matea malog grobničkog Dondolaša.
- Puno zdravja Tebi i ženi, pa se vidimo.
Post je objavljen 03.01.2017. u 10:00 sati.