Marketing
Šetnja do Resnika
Sutra će siguro sneverat ... ne samo zato ča je Vakula reka, nego san se i ja odlučija poč malo prošetat uz more, put Resnika, sa Zakoniton i Principesson. Nisu mogle doć sebi kad san to izjavija ... deboto da san in triba nosit cukrene vode 
Ali brzo su došle sebi, parkirali smo Kobilu Suzi kraj onega kafića, na početku plaže, i krenili pomalo na zapad. One bi mogle krenit drito iz kuće, ali su učinile ustupak radi mene 
Ne bi prizna niti da me mučidu indijanskin metodan, ali odaaaaavna nisan proša na ovu stranu, bar ne na noge. Da ne lažen, jesan, prije skoro četri godine, kad san profesorici Sokol nosija rukopis mojega/Vinkinoga libra da je zamolin da mi učine recenziju. A i to je bilo samo kvarat puta ...
Krenili smo, laganin tempon ... vidija san da bi one mogle brže, i bilo mi je drago da su malo brenzale (prikočile, za sjevernjake) ... samo su mi brojile kad bi se zaustavija. Ne zato ča san se umorija (još!) nego samo da potegnen koju sliju ... ka ovi par galeba koji se griju na popodnevnome suncu, prkoseć laganome povjetarcu ča nan svima daje do znanja da je ovo ipak jesensko vrime ...
¸
Malo dalje san sinja i jednu zalutalu kupačicu, ali dokle san se mašija za fotoaparat, već je utekla iz mora i sakrila se izad šugamana (ručnika, za sjevernjake) ... ali zato ova dva kajića (brodića, za sjevernjake) nisu mogla uteć ...
Zna san da je doli put Resnika puno povjesni lokaliteti, ali nisan se nada ovolikoj količini ... svako malo je postavljena ploča koja na domaćemu i tudeškome jeziku opisuje di se trenutno nalazimo, odnosno ča je tot bilo prije par stotin/iljad godin ...
Nisan se tija forsirat pa poć daleko, za prvi put, ferma san negdi na podan one nove crikve na Bile, malo odmorit, a one dvi su produžile još malo naprid.
Tu san sinja još i ove zadnje turističke laste ... ča in se ne da odledtit doma ...
... a i ča bi odili nazad, kad su tamo siguro već izvadili zimsku garderobu, a ovod, ako baš niste u ladovini, morete još komodno šetat u kratke rukave, ka ča san i ja učinija.
Put nazad, do našega prometala, je bija lagan ka pjesmica, jerbo su mi one činile društvo, i pričale ča su sve vidile puten kad nisan bija sa njima.
Nadan se da će i ove dane učinit lišpe vime, da ponovimo ovo ...
Zdravi i veseli bili!!! 
Post je objavljen 09.10.2016. u 01:56 sati.