Marketing
#CRO
Olitiga u punome nazivu #CRO #OrangeSponsorsYou
Oće li oli neće Ajfelov toranj, najrazvikanija gomila ruzinavoga (zarđanoga, za sjevernjake) željeza staroga više od sto godin, zasvitlit u našoj crveno-bilo-plavoj kombinaciji? Zanimljiva marketinška kampanja jednoga od sponzora "Eura". Svi smo se užeščili, iako elementarna matematika kažije da nimamo šanse u "borbi" sa Turcima, jerbo nji samo u dijaspori u Dojčlandu jema više vengo nas u cilomen svitu.
Jema bit da je to postalo važnije pitanje od toga ko će vodit Vladu RH, oće li se povećat brojno stanje u Remetincu i di će, na kraju, odit pinezi od INE: u Zagreb oli u Budinpeštu.
I oće li bit pinez za penzije 
Glavni hit ovi dan ...
... postepeno su zaminile navijačke borbene pisme, toči se piva na tolitre, kupujedu se Normabeli, za svaki slučaj. Ako ča pojde krivo, a ne onako kako smo mi zamislili, jer smo, ka ono, ka i uvik, najboji na svitu. «I okoli», kako je mudro zaključija pokojni Šunje, kroz usta Duje u «Fleka», na početku «Veloga mista».
Mislija san da smo mi samo najluđi grad po pitanju baluna, ali jema bit da je cili svit rebambija (poludija, za sjevernjake)
Posli prve utakmice, neka smo is svi bili prižalili, naši su potaracali Turke i refali in se za ono nazad osan godin kad su nas izbacili ... odma nan je krešija apetit!
Skromni kakvi već jesmo, ne priznajemo ništa ispod barenko finala, a onda ko-koga 
Sinoć je kombijen krenila mala navijačka ekspedicija iz Mašograda
Foto: @pechina
Javili su se u nika doba da su kod Milana. Ne kod Milana Pudele vengo u onega od Berluskonija ... pa su bili samozatajni sve dokle se nisu dokopali Sent Etiennea .... lipoga maloga gradića koji jema (još uvik!) veliki nogometni klub. U kojemu je prve nogometne korake učinija Platini, i u kojemu je onda branija Ivan Ćurković, imenjak i prezimenjak našega Zlatana, trenutno na radu u Šveskoj.
Svakome ko je u ona doba bija navijač Hajduka i dan danas se stvori grop (čvor, za sjevernjake) u želucu kad in ko spomene oti «#$%& nogometni klub. I način kako smo ispali, a jemali smo deboto najjaču momčad u 100+ godin Hajduka.
Nadan se da će se naši «kockasti» ipak drugovačije provest, i da ćemo se jemat razloga večeras veselit, a treću utakmicu sa strašnon Furijon odigrat «za šalu», ka na male branke.
Naši su odma po dolasku najprin izvisili zastavu na balkon ....
Foto: @šljivo
... a onda su krenili u pregovore sa domorocima ...
Foto: @šljivo
... ka i sa drugin navijačkin skupinama ...
Foto: @šljivo
Foto: @šljivo
Foto: @šljivo
... pa su vrlo brzo došli do zaključka da se moredu ravnopravno nosit sa svima. Isto ka i naša reprezentacija 
A nije nikakvo čudo, jer mašogradsku delegaciju činidu tajnik od maškar Mario Ban Buiš, pricidnik Mjesnoga Odbora Damir Rajčić Šljivo, pricidnik HNK Jadran Dragan Božin Relja, klapski pivači klape «Podvorje» Domagoj Božin i Tino Soldo, a Cara su vodili najviše zato ča sliči na onega sa dvadeset kun
Nadan se da ćemo večeras, izad osan uri, svi mi doma ka i oni ča su potegli do Francuske, bit dobre volje. I naravno, da se živi i zdravi uredno vratidu doma!
A ja san, fala na pitanju, iz subjektivni i objektivni razloga osta doma 
ali zahvaljujuć blagodatima moderne tehnologije i dobrin ljudima, ka da san na licu mista
Fala najlipša @pechini za sliku od jučer i Damiru Rajčiću Šljivi za redovite fotomaterijale sa lica mista
Zdravi i veseli bili!!! 
Post je objavljen 17.06.2016. u 15:33 sati.