Marketing
SVA TA PUSTA GODIŠĆA
Više put me judi pitaju od kada postoji Paški karneval i tradicija maškarivanja ja odma odgovorin "odvavik". Tradicija maškarivanja u gradu Pagu datira puno stoljeća unazad kojon domaći narod pokažuje svoje osjećaje.
Nikada ni bilo važno ki si, ca si i od koga roda dolaziš, važno je bilo samo uživat u maškarama.
Istina je da se vlast uvik bojala maškar, jer njihova kritika i šulaci uvik su na svitlo dana donisili sve njihove falinge.
Kada su i branili maškare, one su opstale sve do današnjih dana, a više i nima mista di se ne govori ili ne piše o tradiciji održavanja karnevala i maškaranih tanci. Sada, ili san ja amnestičan ili san neuk ili previše volin Paški karneval, da ne mogu verovat da Vir ima tradicionalni karneval. Neka in bude, neka se judi veseliju. Ki in to more zabranit?, ka vlast in more reć da to ne smiju cint. Ali da je on tradicionalan, zato nebi stavi ruku u oganj.
Mene više muci ca se uglavnom mladost skupja po paškim maškaranim tancima. Da nima socija, reka bi da je stariji svit u Pag zaboravi ca je to maškarivanje i karneval
Na kraj bi se moga upitat koliko je maski kroz spomenuta stoljeća pasalo Paškin karnevalon? Koliko bi stranica ima libar Paških maškaranih memoara, i ca bi se sve moglo pročitat u tim recima, i ca bi bilo između njih? Koliko lipih životnih štorija a i onih drugih, bi bilo u ton libru. Na koliko njih bi mo se nasmijali, na koliko bimo slegnuli ramenima i koliko god mi to želili ili ne, bismo mogli reć, ipak, život ni bajka? I baš zato ca je život takav kakav je, ki put nan je lipo, ki put nan je ružno, maškarani tanci dojdeju kao misto di sve svoje brige moremo uternut uz žmuj dobrog vina, i jedina suza koja coviku dojde na oci je suza smiha.
I zato ne cekajte, nego se maškarajte bilo kako, gologa ili pokrivenog obraza i uživajte u svon bogastvu karnevala, kako biste spasili sebe, a u cast svih onih i svega onoga ca se u Pag dogajalo u maškarama, od stoljeća sedmog, sve do danaska.
Post je objavljen 30.01.2016. u 23:46 sati.