Marketing
DA SE NE ZABORAVI - BULAMAN
Pitan mater ako dica u Pag pobiraju "bulaman", pa mi govori: kako si se toga siti, znaju dica u Pag ca je to bulaman?
Bulaman ili "dobra ruka" je stara užanca kada smo mi dica od Nove godine do Tri kraja hodili po kućama svojti i kumovima čestitat, pa bi se za čestitanje dobili i suhih smokav, ka naranža ili bombonov i čikulata.
Vrimena se minjaju kada su se za bulaman poceli davat šoldi. Bili smo kuntentiji dobit ki dinar, nego spomenute delicije, kih je svaka kuća više ili manje imala. Za šoldi smo mogli prevarit mater, pa cogod ostavit za sebe, jer kada bi došli doma, mat bi odma pitala:- koliko ste šoldov dobili?. Vamo dajte ti šoldi, da moremo tornat kada namin dojdeju čestitat. Tako su se ti šoldi vertili u krug, ako si bi žbrikan ostavi si ki dinar zasebe.
Vrime od Božića do Tri kraja je vrime kada se i kuće blagoslivljaju. Pita san jedan puta mater da zac pop i akoliti dobivaju bulaman, pa me skoro trisnula. Dojdeju ko tri kraja, pa umisto da oni doneseju, oni poneseju. Doneseju blagoslov, sine moj rekla mi je mat. Ca će mi blagoslov kada se sa blagoslovon ne more ništa kupit. Opet triska, jesan moga mucat.
Zato je lipo ca su došli mobiteli, tableti, kompjuteri, ne moraš više hodit po kućama čestitat Novu godinu, ali više nima ni "bulamana", pa vidite ca je bilo boje.
Ca nebi bilo boje da se ta užanca, ta "dobra ruka – buona mano", ocuva ne samo zato da dica dobiju ku kunicu, nego zato da bi morebit onin blagoslovon koga pop donese u kuću, Bog dicu posluša i usliši in žeje. Nemojmo zaboravit da covik bez šoldov je izgubjen covik, pa makar i za one osnovne potribe.
Za kraj triba samo reć da i ova beseda dolazi iz talijanskog govornog područja "buona mano" ili dobra ruka ku smo mi okrenuli u "bulaman".
Nadajmo se da nan ovo godišće neće bit kako i ovo ca je pasalao, i da nećemo ovisit samo o bulamanu.
Post je objavljen 06.01.2016. u 15:20 sati.