Jutros najranije, prije nego san otiša u spizu, jerbo triba kupit friškega kruva iza obid sve ono ča smo zaboravili jučer kupit...zvono zvoni na vratima.
Ajme majko...probudit če mi se punica a pas će počet lajat ka manit...i eto ti problema !
Brzo se skočin i otvorin vrata - kad ono šjora File.
A ča je ? Da nije kakva nevoja ? - pripadnen se ja,
A naravski da je nevoja, i to kakva nevoja....! zaviće odma s vrata moja susida i brzo šmugne kraj mene u kužinu i odma sidne na katrigu sve puvajuči i tarući onon svojom štrkljavon rukon njeno oznojeno čelo..
Slušaj Marinko, znaš li ti broj telefonski broj od onega Bože ?
Ma kojega Bože, za Boga milega...šjora File ? Koji vas je Bože spopa u ovu najraniju uru ? Oli ne vidite da san se taman sporemija u spizu dok još svit nije navalija kod Vojka !
Ostavi se ti sad Vojka...Neće ti on pobić. Danas će on cili dan držat svoju butigu otvorenon.
Ma će mi nestat kruva !
Benti neću reć Bpga....slušaj me vamo, tovare jedan...Ne bi ti došla u ovu najraniju uru a da nije hitno ! Vrag ti izija i kruv. i spizu ! Ka da je to najbitnija stvar ! Radit će pekare za vas guzonje danas dokle god bude tribat. Zaraj vas neće ti bidni judi ni Badnjak proć kako Bog zapovida ! Aj sidi ovod i mući po minuta da čuješ šta oću !
A šta to očete...siden i ja na katrigu, već dobro snervan,
Oću zvat Božu !
Ma kojega Božu ?
Kako kojega ? Božu privaranta ! Božu nesriću nesriknju ča nas je sve izvoza i na kraju zajeba ka nikor do sad - ka da smo glupa mularija !
A....očete reč Božu Petrova. Psihijatra !
Ne nego Božu Cukuna sa Matejuške ! A da koga nego njega , tudume jedan spliski !
Pa ko će meni dat njegov broj o telefona, lipa moja šjora File ?
A jemaš li onda broj od onega Karamarka. Sto posto su njih dvojica sad stalno skupa. Biće slavidu !
Taman posla ! Ko bi meni da njegov broj ?
Ma znala san ja da od tebe nima nikakve koristi...da si ti za ništa !
Pa nisan van ja telefonska centrala pa da znan svačije brojeve !
Da svačije ? Ne pitan te ja svačije brojeve vengo broj od onega Ostapa Bendera !
A okle vi znadete za Ostapa Bendera ? - začudin se ja iskreno i ka malo razrogačin oči !
Nempj da te sad opalin po toj tintari, zajapuru se šjora File i ka zamane rukon povrj moje glave...
Ča misliš da ni ja nisna držala libre u ruke, jeli cukunu jedan pripotentni ? Ostap Bender je pravi privarant ali je baranko meni uvik bija simpatišan - a ne ka ovi Bože plačipizda....Glumata sveca i ka nikega velikog virnika a sve nas je zajeba i priveja žedne priko vode ! Jo da mi ga je samo trevit dikod...A čuja bi me, tako mi ovega Boga - sva se zapuva moja susida i počme se znamenovat ka da je u crikvu a ne u moju kužinu.
Ti znaš Marinko da san ja jedna bogobojazna žena i velika virnica - ma mi ovo smrdi na one pokvarene među popiman - a najde se uvik i takvih. Pa jesi li ti pročita ča je oni biskup iz Siska napisa, Ka da nije božji nego đavliji čovik ! Svi su mi se intrami okrenili naopako kad san čula ča on govori. Ma di toga jema na ovemu svitu ? Ajde reci mi ti. Ma di ? - izbeči ona svoje krupne oči prima meni tako da san pomislija da bi je zbilja moglo kolpat i izvrnit tu isprid mene.
Očete li čašu vode i cukra, zabrinuto je zapitan.
Kvragu ti i voda ti i cukar. Jemaš li bićerin prošeka. Evo san se sva infotala ! .... zavapi ona.
Ajme skužajte ča se nisam odma sitija. Baš san tikvan. Jemate Vi prav. Jeman prošek ! Naravski da jeman ! Sad ču ja....odma, evo već letin.....i brzo se skočin do veltrine, izvadin bocu prošeka i natočin joj bičerin.
Vidin ja da joj se ruka nekako treska, sva se uzbudila i istinski snervala.
Nagne glavu, poravna kosu i drugon rukon privati bićerin i popije u jednon gutljaju spasonosnu zlatkastosmeđu likariju sa Hvara.
Je li ovo od Plenkovića ?...upitno me pogleda.
A nije, nije...To je od jedne naše poznate, naše prijatejice s Hvara.
A vidi se vidi da ni umjetni vengo pravi. Aj, Bog ti da jubin, nalij mi još jedan bićerin - da mi malo zasladi ovi gorki život !
Ma di gorki život ?! Pa danas je Badnjak !
Je, je,,,nije da nije, Marinko moj...ali vidila san ja i boji Badnjaka od ovega. Sve mi je to zagorčija oni Bože ! Vas mi je život pa...Nikako san štufa svega...Sve mi je pokvarija, vraga izija !
Ma ajte šjora File ! Koga briga za njega ? Neće ni on dzgo durat !
Je ma san mu ja virovala !
Oli ste glasali za njega !?
Ma jesi li ti lud...skoči se ona s katrige. Naravski da nisan. Ne izdajen ja svoje kolure ! Nisan ja od taki ! Ma san mu isto nikako virovala a ono on ispa pokvaren ka mučak....pomalo sjetno završi ona svoju tiradu i oped sedne na katrigu.
Ajmo mi danas sve zaboravit pa ćemo poslin o tome, ima vrimena - pokušan ja ublažit njenu zlovoju.
Ma ne mogu, ne mogu nikako Marinko moj. Zato san mu tila sve sasut u facu ča mislin o njemu !
Kako u facu - priko telefona ?
Aj ne zajebaji ! Tako se to reče....ča me sad tu zamantaješ...Neš me uspit smutit. Nać ću ja njega. Kad tad...pomalo priteči zakljući ona.
Dobro, dobro...šjora File, nego ja zbilja moran u butigu !
Aj dobro , kad več greš paš i meni kupit glavu kruva ispod peke !
Jeli bilega kruva ?
Crnega, crnega...crni Marine, crnega ako jema. Ionako mi je sve crno prid očima !
Dobro, dobro...evo već trčin.
Ma molaj malo . di si navalija ? A jemate li vi danas bakalara za obid ?
E sad smo još počeli vriđat šjora File ! Naravski da jemamo ! Eno se još toča u vodu !
Ma ne vonja ništa - ka priko voje doda ona. Bićeš kupija onega najcinijeg...treča kategorija !
A Vi lipo dodjdite izist s nama pijat bakalara i popit žmul vina pa ćete se uvirit da je pravi, da piva sto jezika !
Nemoj mislit da neću ?! Bome eto mene ! A kad van je obid ?
Oko bota !
Ma od gušta Vas zoven. Vi ste nan uvik najdraži gost !....iskreno dodam na kraju.
Aj ne begenaji mi, mangupe jedan, znan te ja tico - nježno me po leđima tucne moja dobra susida.
I tako se dignemo mi sa stola i polako krenemo prima vratima o stana kad se ona ujedanput zaustavi i ka da priti nekome nevidljivome isprid sebe, koga samo ona vidi - opet počme ponavljat svoju jutrošnju pismu :
Oš opet poć u bilježnika gusaru jedan neretljanski. Moš gujicu obrisat s tin svojin papiron ma obraz neš nikad više uspit obrisat! Unuci ćedu te se sramit ! Bogu ćeš platit račun, ja ti kažen. Neće te spasit ni sto miljuni ispovidi. Neš se nikad prid njin moć oprat. E nije ovo koalicija vengo sporazum ! E nisan ja za niti jednu stranku ! Ma ča ti misliš da smo mi mone ? Ti si mona da nemoš bit veća, to ti ja kažem...opet se zapini moja šjora File a ja sve čekan s rukon na kvaci od vrata....ma ona ne fermaje nego sve žešće nastavlja svoju litaniju : Izgorit ćeš ka šuferin ! Evo ovako ! Pufffff !...počme ona puvat i mavat s obadvi svoje ruke meni drito isprid nosa.....Moli ti Boga da ovi cukun nema tvoj broj telefona - zapriti ona i okrene se prima meni. Čuja bi ti ono ča te gre ! Ja ti kažen ! Najebat ćeš ti brže mego ča si mislija, Moš ti, ka niki seoski frajer, dizat oni kolet od svojega crnega kapuoa...maš ti bit manji o makova zrna, viruj ti meni, .Proda si se za brokve hadezejciman. A još su gori oni tvoji iz tega falšega Mosta ča ne volidu Karamarka ma volidu vlast - pa su sami na sebe pjunili ka zadnji šporkaćuni...!
Vidin ja da nema kraja ovom izlivu njene gorčine pa je nježno uvatim šoto - braco, otvorin vrata i polako s njon izajdem na hodnik i doveden je do vrata o njezina stana. Ona je cilin puton od tih par metara i dalje vikala, zazivala Boga i sve svece, Božju Majku i Svetoga Duju...da kaštigaju Božu, lažnega virnika, koji je, po njoj, prikršija sve ča niti jedan virnik oli pošteni čovik ne bi smija - a zaraj čega sve to, zaraj čega ? Za bokun vlasti a sve pivajući kako mu vlast niti triba niti je on želi - ma je vazeja više ministarstava vengo bilo ko dosad u našoj Rvackoj i učinija od sebe silnika silnega su svojih trinajestak posto glasov ča ji je dobija od išenpjanog naroda koji mu je povirova ka pravome lažnomen i falšomu proroku.
Kad joj je nevista otvorila vrata skužavala mi se ča me šjora File gnjavila na ovo Badnje jutro - ma san joj ja reka da je šjoru Filu uvik dobro ćut pa i onda kade se čovik žuri u spizu ka ča se meni žuri..
A ona mi je još na kraju kroz poluzatvorena vrata dobacila :
Aj vidimo se onda na bakalaru i boje ti je da bude dobar jer š me inaće ćut -. a onome lažljivon metkovcu kobogda prisija bakalar ako ga bude danas okusija !...zaviče u zanju.
Ne bogohulite šjora File na ovi dan,,,,Ne bogohulite - dobacin joj ja odlazeći a odma iza toga kroz već zatvorena vrata začujen njen piskutavi glas :
Još čemo mi vidit ko će se Raja rajskega nauživat a ko Pakla napatit ! Još ćemo mi to vidit, oćalinko moj !
Post je objavljen 24.12.2015. u 09:50 sati.