Marketing
DA SE NE ZABORAVI - SUKVICA
"Sukvica" ni beseda ka ima svakodnevnu upotrebu, ali je isto starinska, naša paška. Lipa je a bome i slatka.
Ovo su dani kada se ta naša sukvica najviše dupera. Nima kolača za Božićne blajdane u kih ni bilo malo sukvic. Fritule bez sukvic, orehnjača ili štrudel od jabuka je nezamislivo. Kada san bi manji ni baš bilo puno toga, pa kada je mat nacinjala kolači, dobit ku sukvicu je bila lutrija. Najslaje je bilo "ukrast" ku sukvicu da mat ne vidi. Mi smo imali sriću da je otac sa vijaja uvik doni ki paketić sukvic i mat ih je cuvala samo za kolači. Crvene, miće i slatke!
Sukvica je sušeno grozje ali od grozja ko ni imalo pešćice. Retko je u Pag ki ima takvu verstu grozja, ali bilo je. Siti san se kako je nana Lućinka sušila grozje od koga je dobila sukvice. Sušenje je najstariji način kako sacuvat za zimu malo grozja ili smokav kako bi se za ovi blajdani moglo imat i uživat u njima.
Sve više me cudi kako se neke stare besede u Pag pomalo gube, kako se sve više koriste besede ke starijim judima i ne znače previše. Triba svako malo spomenut se i reć kome kakvu staru besedu da se ne zaboravi, jer se ton staron besedon sitimo svega onoga lipoga ca je za namin.
Tako našu sukvicu Primorci zoveju ciziba, u Dalmaciji se još negdi zove rozina, suvica ili suhvica.
Kada govorimo našim starin jezikon onda je to imenica u jednini, a u hrvatskom jeziku je u množini i govori se grožđice. Jer niki ne rece da je u frite stavi grožđicu, nego grožđice. Zato je boje u frite stavit sukvice, pa si miran sa govoron.
Sukvica je imala i svoje pogrdno značenje, kada bi se kome reklo da se osuši ka sukvica. Ako ni šlo po zlu onda to nebi čovika uvridilo, a više put je bilo tako.
Neka ovi blajdani ne budu bez sukvic, a mi se potrudimo da sacuvamo ovu slatku besedu.
Post je objavljen 22.12.2015. u 11:52 sati.