Pregled posta

Adresa bloga: https://blog.dnevnik.hr/iskonskipag

Marketing

ŽIVOT JE VJEČAN !





"Smrt je samo dio života, jer je život neuništiv. U smrti nestaje trošni, smrtni dio čovjeka, a duh, ideja, misao, djelo ljudsko živi i djeluje."

Ovako je zbori veliki Jure Kaštelan i more se reć da je to covikova sudbina. Od kada je svita i vika judi su se rajali i letili kroz život, ne misleć na sriću, a doživili su svakakva zla, i ni bilo druge nego pomirit se sa onin ca dohaja i pomirit se za onin ca je ostalo iza nas, i za onin ca će doć posli nas.
Budi ono ca jesi, budi covik, covik ki mora puno lavrat i kada nebi sti, jer niki ni sam živi, i ne žive. Koliko god mislili da smo boji i pametniji od drugih, moramo se jedni na drugih naslanjat, da nas nebi bura otpuhnula kako i komad karte kad joj se najde na tir.
Ovo su dani onih ki su bili snamin, i onih kih se više i ne sićamo, ki su nam u mislima ostali samo po tome ca su nam naši stariji o njima govorili, koliko su se mucili i škerbili i kako su brižni po ton teškon putu živjenja hodili.
Pred nama su blajdani Svih svetih i Mertvi dan kada je red da se sitimo svih tih dragih judi da in užgemo sviću i lumin, stavimo kiticu cvića na grob, ako ih ni vrime oterlo i hitilo u zaborav.
Svit se je promini.
Sigurno je da se u Pag nekada drugacije živilo nego danas, judi su bili vezani za zemju i za more i samo se od toga živilo. Puno ih je bilo ki su partili brodon za bojin životon. Ali uvik su u mislima imali svoj dom, svoj kraj i kada će se tornat doma da u njemu najdu svoj mir i svoj grob.


Bilo kako bilo, svakon coviku dojde kraj, svakome je red selit posli nikog vrimena. I tako, kada ovi dani mislimo na one ca su se rodili puno velikih nada, ca su se mucili celoga života kako bi to sve dospili ucint, bili mladi i gizdavi, puni snage, pa kako su godišća cinle svoje, bili zreliji i pametniji, pa se sve više prignjevali zemji ka ih je zvala, i ne smimo zaboravit koliko ih je bilo, i ki si šli u mrak od koga se više ne torniva. Još se ni niki rodi, ki ni tamo dospi.
I zapametimo besede onih malo starijih judi, ki znaju reć, kada dojdeju na Cimitar, da ih je sada tote više kih poznivaju, nego meju živima.

Sada kada su se oslobodili svih ovozemaljskih muk, ne samo na Svi sveti i Mertvi dan, nego svaki dan bismo im morali reć: počivajte mirno, volili smo Vas, i još ste snamin.




Post je objavljen 29.10.2015. u 10:50 sati.