Marketing
DA SE NE ZABORAVI - LUMACA
Da ne izajden od svitla i sve ca je za svitlo vezano, ne moren pasat preko "Lumace".
Najviše su me na lumacu potakle dvi stare zaružinavile zapušćene lumace moje nane Katice Lućinke, koje san naša u Studeno vraćajući se u svoje ditinjstvo, u zapušćenoj cobanskoj kućici, ku je moj barba Ivo Madona prošlo godišće ponovno obnovi i verujen da se našlo mista za novu lumacu dikod na zid kućice.
Iako je lumaca za današnje svaćanje davala slabu svitlost, isto su se svi posli ki su bili planirani za tu vecer pored nje ucinli. U spomenuto Studeno moja nana Kate je obično pocinjala, a mogli su se obavit i drugi posli pored svitlosti ku je davala lumaca. Nana je znala pored lumace i šit čipku.
Lumaca je beseda koja dolazi od talijanskog govornog područja, a označava puža. Sei una lumaca: spor si ko' puž!
Kod nas je lumaca – svića na petrolje. U donjen delu lumace, ili rezervaru ki je od stakla, bi se nalilo petrolja, u koga je ulazila kurdela, ka se je pomoću ručnog mehanizma mogla provuć u gornji del lumace, di se mogla užgat.
Oko tog rezervara ucinjen je od lakog metala i otpornog na teplinu postament za malo zercalo, ko je davala još dodatno svitlosti, a verh je bi ucinjen tako da se lumaca more obisit. Plamen se diza uz stakleni tub i tako je dava svitlost.
Danaska moremo kakvu staru lumacu nać u neku konobu, di obišena stoji pored starinskog armeruna. Morebit je ki put i užgeju. Većinom je tub neocišćen od dima da nas siti kako je to nekad izgedalo. Dugo tako stojiju stare lumace kao spomenik duši i svaka more ispripovidat svoju štoriju, dok se duša umorna odmara u svojim sićanjima.
Post je objavljen 21.08.2015. u 20:28 sati.