Marketing
NOVI – STARI GRADONAČELNIK
- Reka san da ću Ti se javit kada bude zibran gradonačelnik.
- Ceka san da vidin ako si od besede. Pa ca ti se cini?
- Ca mi se ima cint, izbori su sve rekli, zaželit novon/staron gradonačelniku mirno more na ovoj uzburkanoj političkoj Paškoj vali. Samo ca je godišće dan hićeno uzalud i potrošeni šoldi, ki su se mogli uložit u pametnije stvari.
- Ca bi to po tebi tribalo bit pametnije?
- Okreni se malo oko sebe, drugi put kada pojdeš doma, pa ćeš vidit puno toga di su se ti šoldi mogli utuć. Uskers je prid vratima, a pitanje je dali je ca pocišćeno u Pag i dali će gosti, ako ih bude moć ca vidit.
- Ti bi samo grad redi, ca nima pametnijih stvari.
- Reci mi, ca bi to po Tebi tribalo bit pametnije pa ću Ti odgovorit. Ca još uvik tribaju radne akcije, ca judi ne plaćaju komunalnu naknadu, zac se koristiju ti šoldi? Ako ovi dani nisi bi, odi do Opatije pa ćeš vidit zac judi tamo plačaju komunalnu naknadu. Jer u Opatiju ne moreš živit od fabrik. E, jadna Ti torba. Kada ćeš poć apartmani poredit?
- Samo ti zajebavaj.
- Zato nan i je tako u Pag, jer se vertimo oko toga, samo ti zajebavaj i samo ti ne zajebavaj, dok su apartmani puni, a kada su prazni onda kalivate svi Bozi sa neba i svi su van krivi, za ki Euro više. Kako će grad izgedat i ca će se u njemu dogajat, to vas ni briga. Ja bi svin turistima zabrani dolazak u Hervatsku pa bi voli cut onda ca govorite, i ne samo vi apartmanisti, nego i političari. Nimam Ti više ca reć, cujemno se kada budeju boja vrimena.
- Pa ca ni već zatoplilo.
- Ne, tek se sada potaklo, a dok se nagori tribat će vrimena. Bog.
- A, Bog kada ti tako govoriš.
Post je objavljen 23.03.2015. u 20:05 sati.