Marketing
GRADONAČELNIK U RALJAMA ŽIVOTA
- Ca nisi reka da ćeš se javit kada bude zibran gradonačelnik?
- Reka san, ali gradonačelnik još ni zibran.
- Prati san svi ovi dani ca pišeš, ali i Ti si politički izbjega komentirat političku situaciju u Pag.
- Pa ca je to politička situacija u gradu Pagu, to više šumja na trejatar, a u trejatru je sve dozvoljeno. Vidiš ca ovaj Frljić cini u Rječko kazalište i niki mu niš ne more, nanka mi ki ga plaćamo. I onda mi je najlipše kada Obersnel rece da je gradsko poglavarstvo donilo takvu odluku, samo ca ni reka sa cigovin šoldima plaća te odluke. Ca mu je odluke nana ostavila u dotu.
- Želko ti je pome Marca.
- Nikada mi ni krivo kada dobro za grad dolazi od Golije, jer to znači da na Goliju živeju dobri judi. Želko je to sigurno. A, ca se tiće Marca, moran mucat i po stranačkoj sprezi i po rodu.
- Ca sada oćeš reć da su ti Marcovi rod zato ca je barba Valo Marco živi ti kod matere i bi jon za teton.
- Ne, nego zato ca je Tinova nana Madonka, ako nisi zna.
- Sada si me opet uvati u đir. Od kada je Tinova nana Madonka.
- Od uvik ca ja znan i mome dedu Madoni perva rodica.
- Ma ti stalno zajebavaš Bebiću.
- Ti provjeri kod judi ki to u Pag znaju, pa mi se javi.
- Pa di mu je stala nana?
- U Šimuni, bila je pozakonjena u Fabijanića, pa se po meni Šimuni tribaju zvat Fabijanićevo. Pa ne razumin kada svi Fabijenićevi u Šimuni govoriji da su oni Šimunari, a ne Pažani. Tako su ti svi moji Pavinovi u Proboj, Probojčani. I njima je mat Madonka.
- Zac ti onda brat ni muca, nego su ga onako napadali na PPS-u?
- To pitaj njega. Ja ću ti samo reć jednu stvar. Uopće ne sumnjan u domoljublje moga brata, moj brat je od prvog dana u HDZ, jedini ki je na liniji stranke onako kako ju je dr. Tuđman stvori, jedini ki je od pervoga dana tamo, jedini ki je lojalan i odan stranci. Njega se ne vuce po nikakvin gradskin aferama, u nikakvim forumima ga nema. Je ti misliš da moj brat ni zasluži vjećničko misto. Po ćemu to misliš da je Tino Marco i svi oni kih je stavi na liste pametniji od njega. Ku si to bolancu uze po kojoj miriš možjani. Ovde se ne mećen u ulogu bratova odvjetnika, nego u onoga ki ovde javno more reć istinu o coviku komu je politika sekundarna stvar, ali domoljublje i Pag na pervo misto, i to mu nikakvi Tino Marco i Karamarko ne moreju uzet. Jeti to jasno?
- Pa ca si se užga toliko?
- Vrime je da i ja recen dvi besede, jer ih ima kaj mora u Pag ki misliju tako kako i ti.
- Daj, daj molin te živin Bogon, ja san samo sti da vidin kako dišeš, ti jako dobro znaš da bi ja za Valtera i u oganj ako triba. Ja mu se samo cudin kako more sa tin judima sedit za istin stolon.
- To je veličina covika, svakome pogedat u oci, nisan siguran da to u Paški HDZ njemu moreju mnogi od njih. Znaš ca je još Fortis napisa za Pažani oni ki se oćeju veliki, kako se u Pag rece, oni ki su titulani, ki oćeju vladat gradon: "plemići ki umišljaju da se ponašaju drugacije nego puk, doista su smišni judi i likon i odjelon i navikama i uvredljivim isticanjem". Koliko takvih u Pag znaš?
- Svaki drugi.
- Kada ova komedija bude gotova, cut ćemo se onako kako smo se dogovorili i čestitat novon gradonačelniku neka cretno vodi grad u nova bespuća.
- Ne moreš proć bez Tuđmana.
- Znaš ca ću te pitat:- kadi bi bila i kako bi izgedala ova Hrvatska da ni bilo Tuđmana, ili i ti još placeš za Jugoslavijon?
- Nidi.
- Ne tlapimo više, cujemo se.
Post je objavljen 13.03.2015. u 18:20 sati.