Marketing
ŽIVILA PAŠKA BURA !
Ispada da je ova bura boja nego Paški karneval...združila je judi...svi oni ki se grijeju na struju došli su kod onih ki se grijeju na drva...pekle su se palačinke, ilo se je, ca je ki ima doma. Ajme ka lipo: ŽIVILA PAŠKA BURA.
Možda za sv.Nikolu bude ca dice.
Koliko bura znači Pažanima dokazuje i ova poruka koju san dobi baš kada je ta ista bura pokazivala svoju čud. Kao da je stila reć:- ca ste me zaboravili, mislite da san onemoćila, sada ćete vidit koliko san još jaka.
Bura ko bura, puše bez refula, na refuli, svon snagom sa Velebita kada se spušća. Bilo jedno, drugo oli treto, bura je uvik hladan vitar. Od nje je uvik više hladnije, nego ca provin pokazuje. Stari govoriju da je to zato ca berzo odnosi temperaturu svemu ca je živo. Bura uvik puše tako koda nimaš dosta ruk. Triba deržat facol ili kapu, kapot ti se napuše ko balun, a kraji kapota te tuceju po nogami, koda te ki šibon tuce. Hita ti prašinu u oci. Nosi sol po celon gradu.
Premda se treseju krovi i zidi, kada padaju dimnjaci i kupice, kada se okrićeju kaići napak, kada nima letrike, ipak se ne trepi pred njon, premda je bilo i ranjenih.
Navikli su judi na svoju buru, na sve veze ke su prekinute sa sviton, a ova poruka je dokazala da Pag žive svoj život sa svin onin ca su prihvatili za svoje živjenje.
Post je objavljen 10.03.2015. u 19:25 sati.