Marketing
DA SE NE ZABORAVI – ŽMUJ(L)
Pred neku vecer čuhan dalmatinske pisme, pa mi u uho upade beseda ka se uvukla u puno lipih dalmatinskih pisam, a da nan je svaki dan ta beseda u ustima. "Žmuj", ki nezna za tu besedu?
"Oj, ti šjora Mande,
donesi žmul bevande,
nek cila riva zna
za Bracanina dva."
"Ajmo skupa prijatelji moji
Razmistimo tamburin, katrige
Zapivajmo pismu s kojon srce
U po žmula zaboravlja brige."
"A nije lipša ni Atina, Split nedan za nju
i ča će nam Akropola kad Marjan nam je tu,
furešti kažu da je ovdi lipo ka u snu
a još in je lipše svima uz žmul našeg vina."
Ovde san spomenu refrene tri pisan ke se možda i najviše pivaju uz žmuj bevande kad su fešte. "Dva Bracanina", "Konoba" i "Nima Splita do Splita" su pisme ke nemoreju bez žmuja. Meni je ipak najdraža od svih jedna druga, ka se možda nešto manje piva po feštama, jer toverni više nima, a to je "Dalamatinska elegija" ku je piva legendarni i nikad ponovjeni Vice Vukov.
"To nestaje sve daje,
sve to ča srce zna,
drugare tražim stare,
al furešt sad sam ja.
Ni Duje, Dane, Frane
da dojdedu na mul
kod tete Marijete
da popijedu žmul."
Žmuj se govori kod nas u Pag, cela Dalmacija govori "žmul" tako ga i Bartol Kašić navodi u svojoj Biblii Slavici. Nebi bilo cudo da smo i tu besedu malo okrenuli kako sve okrenemo napak.
U Hervatskon jeziku se za tu besedu rece "čaša" i kako u opisu piše da je to posuda od stakla ka judima služi za unos tekućine.
Čaše postoje u različitim oblicima.
Dolazi od latinske besede "modiolis" ili kako još receju "možul" ili u Istri "mižol", kada razdvojimo mžul – žmul, dojdemo do našeg žmuja.
Dolaziju dani kada će nan tribat žmujov priko mire i to svih versti žmujov. I za šajdan i za blajdan. Ka je to kuća ka nima žmuj za duperat ga svaki dan i žmuji ki se cuvaju za blajdani i ki se vadiju jedino kad su blajdani.
I za kraj. Toverne iz moga ditinjstva su iščezle. Ni bilo ulice u Pag di ni bilo toverne. Puno je svita dolazila u tovernu. Sedilo se za bankon ili za stolon, igrala se mora ili briškula i trešeta, popilo se žmuj vina, pojla ka slana sardela uz malo kapule i ku maslinu, komad domaćega kruva koru, svakako uz dobru pismu za dušu.
Post je objavljen 17.12.2014. u 20:48 sati.