Pregled posta

ĆAKULA NA ĆAKULU

- Niti se javjaš, niti te briga za prijateja, koda san uzemju propa. Pune su te novine i televizija, pa si zato diga nos.
- Kako ne, možeš mislit koliko me briga za to, da niti ubedvat nisan moga radi toga. Da Ti budem iskren, coviku je u svemu tome drago kada nakon toliko godišć truda neki i prepoznade, ca si celog života radi pa makar to bili i mediji.
-

- Bilo je drago i meni, jer znaš kako je ovde u Riku: Vi Pažani ovo, vi Pažani ono uvik puni sebe.
- Ca moreš, takav nan je horoskop.
- Vidin da si svih popjuca na stranicu.
- To si Ti krivo vidi i pročita jer zadnje ca bi ucini za svoj grad i za svoji judi je da bi nekoga javno pjuca. Ali, kompanjo moj ne triba bižat od istine, a ono ca je napisano je nažalost naša istina u ku se more uvjerit svaki covik. Na koncu, na sve to su me upozorili prijateji ki su bili u Pag ovo lito, dobronamjerno.
-

- Najdraže mi je bilo ca si napisa da bi kerneval triba trajat celo lito, i istina je da bi se jedino tako mogla vidit nošnja i ono ca imamo.
-

- Znaš da san i ja malo misli o tome, pa san još jedan put poša pogedat onaj film ca mi je brat stvai na Jutub - "Ovo ni atomska ne more zaustavit", malo san se više posveti tome i tamo ustvari vidi ku moć ima karneval.
-

- Kada budeš imat lazno na miru pogedaj taj film pa ćeš vidit koja je to snaga. Pazi, oni dojdeju na pijacu ne sluteći da će pocet padat kiša. Pa pocme ona livica. Pa svi onda pocmeju: hopa, hopa hopa - hopa, u ritmu glazbe. Ca više daži oni više kolaju. To ne moreš verovat. Niki ne odustaje. Onda imaš jednu scenu muža i žene ki su se ranđali za večernji izlazak. Vidiš da nimaju mota, ali kolaju. Ona u dugoj vešti, pa trese veštu punu vode. Sve visi na njoj, ali ne odustaje. Gradonačelnik sa lumbrelon uruke, kola. Ca se toga tiće, tu se jedna beseda ne more krivo reć, jer Želko je celog života u tome.
-

- I onda na kraju vidiš onu scenu kada kolo fermiva i kada svi onako mokri bižiju da se negdje skloniju. To je strašno. Zato se slažen sa Tobom ca si mi zadnji put reka da bi tribalo reć Valteru da ki taj filmić stavi u kapsulu, jer on stvarno bilježi povijest. Cu san još jednu ca se toga tiće, da kada vidiju Valtera da gre preko pijace sa kameron uruke, da odma svi govoriju da se u Pag nešto dogaja, a da kada nan pasa rojak Jasen sa aparaton, da receju opet gre slikat galebi i cviće. To je taj naš Pag dragi moj kumpanjo, pun oštrih strelica i moraš uvik pazit da te ka ne ubode jer si najeba.
-

- To si istinu reka. Ja san samo onako proša taj film od brata ti, ali ću u miru to pogedat pa ću ti se onda javit. Cujen se sa susedon u Pag, pa mi govori da oni ca su u veštiti su ti svi rod.
- Tako bi tribalo bit, a ca ja znan ki mi je više rod. Dva su po Madonovoj strani, jedan je po Telerovoj strani.
- Ke ti veze imaš sa Telerovima?
- Reka san Ti već jedan put, da mi je pranana bila Telerovica, ca si zaboravi.
-

- Imaš pravo, sada san se siti i ono sa teton Ružon Bercikon pozakonjen u Telera.
- Vidiš da Te pamet služi.
- Ki dva po Madonovoj strani?
- Vjeko Šljivo praded mu je Madona i Ivica Bobić nana mu je Madonka.
- Nisan ni to zna.
- Sada znaš. Jesi se štufa govorit više?
- Zac?
- Da cakod kambjamo, jer ćakulon na ćakulu, besedon na besedu, svi prije ili posli dojdeju na red. Stoj mi dobro i drago mi je ca me pratiš.
- Nisan ja Golijar ko ti, ala Bog.


ĆAKULE O SIROMAJIMA

O, more, da nježno miluješ
žal, ti beskrajno si dobro
naše! I radost nam svaki
tvoj nosi val kad u zoru
se vrate brodice!
Kažu da smo siromaji, al
ćakule to su samo. Naše
ruke vole radit i živimo
zato sritno!

Post je objavljen 25.09.2014. u 17:59 sati.