Marketing
JELI PAG TURISTIČKI GRAD ?
Kad se tornan sa godišnjeg odmora to za mene znači da je litu kraj. Na kraju smo još jednoga paškoga lita za koga bi slobodno moga reć da je za svaku turističku godinu kako i na kompjuteru copy – paste, pa radilo se to o kulturnom ili nekon drugom obliku lita. Ispred sebe imam programe paškog kulturnog lita u zadnjih nekoliko godišć i jedino ca je razlika za pojedine priredbe je u datumima. Sve drugo je isto ili barem 90% isto. Koliko mi uopće koristimo grad kao turističko dobro? Zato slobodno moren postavit pitanje sebi i drugima: je Pag turistički grad?
Znan da će sada bit: daj Bebiću ne s..i. Opet one iste besede, ca bi ti ucini? Ima i u tin besedamin istine. Ali, mene se ne pita, zato tlapim po ovome blogu.
Već san jedan put na ovome blogu predloži da litnji karneval traje celo lito.
Zac litnji karneval u Pag traje samo dva dana?, zac to nebi trajalo celo lito?. Jer da traje celo lito, gosti bi imali priliku vidit nošnju svaki dan, pa bi onda i Robinja bila svaka dva dana, svaku subotu bi naredi da se užige Marka, baren dasak ima koliko oćeš za kavšu ucint. Kud ćeš boje ponude gostima od litnjeg karnevala. Niki trezan, svi zadovojni.
Za koga se organizira paško kulturno lito, kada na tin priredbama nema više od destak judi, baren san i sam svidoci tome. Da ne dojdeju oni ki moraju doć u veštiti i kravate, nebi svita bilo ni za lik.
Još dok je bi Radio Pag moga si doznat ku informaciju, ako ništa drugo baren ko vrime će sutra bit. Ca svaki gre na stranicu Centra za kulturu i informacije da bi dozna kakovu kulturnu informaciju, premda moran priznat i pofalit da je to jedna od bojih web stranica ku grad Pag ima. Na koncu slobodnu WI-FI zonu smo dobili tek prid kraj lita u Mandraču i to temeljen strategije razvoja turizma Republike Hrvatske i Ministarstva turizma. Svaka mala gre naprid.
Postavje se pitanje ca je to ca bi potencjalnog gosta eventualno privuklo da dojde u Pag. I siguran san da ćemo ka' Maksim po divizji govorit kako imamo najsacuvaniji srednjovjekovni grad na Jadranu, da imamo pašku čipku, pašku nošnju, paški sir, pašku janjetinu, paško vino žuticu, zadnje vrime i paški baškotin, i tote fermamo.
Ca je to malo?, kako mi rece moj kumpanjo ovde u Riku. Ki to otok na Jadranu ima? Nanka, jedan uvik odgovorin.
A ki to otok na Jadranu ima hotel Bellevue u svom najreprezentativnijem izdanju?
Ki otok ima Olympic centar bez olimpijaca?
(ovako je to izgedalo lani)
(ovako vo godišće)
Ki otok ima Lokunju sa svin blagodatima ila, bez da to itko nadzire?
(ovako lani)
(ovako vo godišće)
Ki otok ima badava kondot i kupalište za kucini usred grada?
Ki otok ima potezalište za kaići, sa kin gospodari svaki kako ga je voja?
Ki otok ima tako uređene javne površine?
Ki to otok svoje velikane sakriva katridamin i lumbrelamin od kafića?
Ki bi od crkvenih dužnosnika moga reć koliko je vjerski turizam prisutan u grad i ki to kontrolira, ki bi moga po tom pitanju dat neke statističke podatke i koliko grad ima od toga koristi?
I još bi se moglo postavit pitanja bez kraja. Ali, koga to briga?
Jedino ca je sigurno u turističkoj ponudi grada Paga, je da se svako lito otvaraju novi apartmani, novi kafići, novi štandovi sa svime ca ti serce poželi ca ne dura više od dva dana.
To je uglavnom bilo sve ca je grad Pag u ovom kišnon litu moga ponudit gostu namirniku, kada judi od dosade nisu znali di će sami sa sobom.
Siguran san jedino da ovo lito kako nikad do sad nisan vidi toliko judi po ulicamin, gosti od svih strana ove naše ujedinjene Europe, svih jezika si moga cut. Ne more se to mirit sa Zadron, Spliton ili Dubrovnikon, ali judi je bilo. Za razliku od Paga ova tri spomenuta grada mogu sigurno reć da su turistički gradovi. Ovi gradovi su ponudili sve ca imaju, sva vrata su pootvarali.
Tek se sad vidi koliko toga triba ucint da bi Pag posta turistički grad. Za pocetak bi možda bilo dobro ucint autobusni kolodvor, jer ono ca se svaku vecer dogaja ispred "Barcarole", je više nego jadno. Samo san ceka jedan dan kada će se svi oni autobusi i auti ki išćeju parking, pa svi oni sa prikolicama sa kaićima porazbijat i bit šušura da će sve javne službe imat posla. Fala Bogu sve je pasalo kako triba.
Siguran san da ima njih puno ki misliju da Pag i ne triba postat turistički grad, jer in turisti greju na živci. Koda su turisti najvažniji u životu ovoga grada. Najvažnije je da je Pag na pervom mistu grad u kome uživaju živit Pažani. Morebit se dogodi da bude lipo i turistima.
Tako san pročita komentar na jednom paškon portalu, normalno - anoniman: Pag voliju svi oni ki kradeju i oni ki su pošteni pa svi vajda tu živemo, pa svi smo mi Pag.
Zato za kraj postavjan pitanje: "Zac su u Pag judi svega štufni? Jer se u Pag nikad niš ne kambjiva."
Post je objavljen 14.09.2014. u 18:35 sati.