Marketing
MOKRI 55. LITNJI PAŠKI KARNEVAL
Ki govori da vrime ne piše povijest? Ono ca se dogodili na pijacu 27.07.2014. i to na 55. rođendan litnjeg karnevala, ostat će zabilježeno u povijesti, jednako kako i snig ki je u Pag pada 1929. godine.
Ki se je nada da bi ucred lita moglo tako dažit. Ona livica! Niti jedno lito u zadnjih sto godišć ni bilo kako ovo lito, tako govoriju svi oni ki bilježiju vrime, za to je ovo lito ko će se pamtit po količini dažja ko je palo, i ko će po tome zauzet svoje misto u povijesti.
Gedan malo snimke ca mi je brat Valter stavi na jutub, pa ne moren doć sebi. Ka je to moć u tome karnevalu?! Dobro je Valter napisa u najavi svoga filma: ovo ni atomska ne more zaustavit. Ca više daži, oni više kolaju, ca glazba više svira oni sve uporniji. Ni kopat, nego kolat.
"I po dažju, i po buri, po neveri i bonaci, staro, mlado, žene, dica skupit će se na Pijaci." Tako se u Pag piva za karneval, pa ca ima veze je litnji ili zimski, glavno da je karneval.
Duško Paro je napisa pismu karnevalu:
"Sa maškarama, puna je pijaca, kolalo se u tri kruga,
Pivala se ona pisma stara:"Oj Pijaco široka i duga"
Jušto ja tako i bilo. Ne moren verovat ka je to voja bila, koliko samo snage triba onako mokar kolat. Niki ne odustaje. Svi perkosiju vrimenu. Padaj koliko očeš, ali mi ti nedamo gušta.
Na kraju završna scena, kada glazba fermiva svirat svi bižiju da se sakriju. Di ćeš više tako mokar ko kokoša bižat? To je tako u coviku, to je ono ca ga tira a da sam nezna zac.
Jedna je samo istina da dok smo ukolo i svi zajedno kolamo ništa nan na svitu ne more stat na put. Cin kolo ferma, mi se raspademo koda nikada nismo bili ukolo. Sada mi čarije dolaze nanine besede ke mi je uvik govorilo: sinu moj u ko si kolo, tako kolaj.
Fala Kaldu ca mi je ustupi ove slike.
Post je objavljen 28.07.2014. u 22:53 sati.