Marketing
DA SE NE ZABORAVI – PEMEDEVOR ili POMIDOR
Pemedevor a neki receju i pomidor. Ma, jušto je sve jedno, još ako su onako pravi domaći, narizat ih, pa malo naše paške soli, lunjskoga maslinovog uja, kakvu kapulicu narizat i kap domaće kvasine – ca je boje od te salate u ove litnje dane. Na kraju smo domaćih pemedevorov, retko se više di more nać domaćih pemedevorov. Nekad ih je bilo puno Blato, a danaska više ni žab nima u Blato. Sada jedino moremo kupovat one lipo poštivane u kašetama, u trgovačkim centrima, ca svi izgedaju ka' jedan. Pemedevor je kralj jelovnika i nezamislivo je danas jedno jelo a da u njemu ni prisutan pemedevor. Osim ca je zdrav i niskokaloričan, bogat vitaminima i mineralima, snižuje kervni tlak, i povisuje izlučivanje želučanih i crijevnih sokova, olakšava probavu, svo bogastvo je u njemu, tako govoriju libri.
Kako samo različito prilazimo pemedevoru od onoga kako lipo miriše, pa do onoga kako smerdi. Sićan se kada se nacinjala konšerva, kako je cela ulica vonjala po pemedevorima, i kad je puna ulica bila malih sitnih mušic ke su se kupile oko tih pemedevorov. Teta Nevajka je u ulicu najviše nacinjala konšervu. Onda bi druge ženske pasivala i govorile: "vo se više ne more zdurat, koliko smerdiju ovi pemedevori, koliko se samo mušic skupi, nikad ih se liberat, covik nikada mira nima u ovu prokletu ulicu. Di san se vo pozakonila. Da mi je bilo znat?!"
Teta Nevajka bi u jednu gustu belu pecu stavila ti štrukani pemedevori da se cidiju i dobila bi pravu domaću konšervu.
Ta misal o konšervi torniva me u moje ditinjstvo kad smo konšervu kupovali na deki u butigu. Konšerva se prodavala u važ od late, od dva-tri kila i vernjacom bi ti na masnu kartu prodavačica, stavila konšerve koliko bi mat rekla da kupim. Od deset do petnaest deki. Ki je moga odolit onome mirisu konšerve da ne zavuceš perst u kartu i ne poližeš malo konšerve. Sićan se jedan put kad me mat poslal da kupim konšerve, butiga se zvala "peti april", i do kuće sam skoro svu konšervu poliza. Dajen materi kartu sa konšervom uruke, a na kartu ništa od konšerve. Tu i tamo malo konšerve, jedva da more stat na jedan kučarin. Najprije je pocela vikat namene i zamalo mi je trisku zalipila, ali se onda pocela smijat, pa me to iznenadilo: «Ca ću sad u gulaš stavit?». Još mi i sad odzvanja njezin glas u ušima, ma ni za verovat kad se malo ohladila, poslala me je po drugu konšervu. Dercuć sam poša kupit isto tako berzo joj doni nazad. I danaska mi je ostala vicija da zaboden perst u konšervu i poližen je, makar malo, samo ca danaska znan da neće namene više niki vikat.
Verujen da se stariji Pažani sićaju kada su na pijacu Povjanke prodavale pomidori, jer su južna sela tako govorili, puni banci su ih bili:
-ala friških pomidora, jutros ubranih, lipo mirišiju, sve bogastvo je u njima. Ala, još malo.
-Poc su van ti pemedevori?
-Po petnaest, barba.
-Po petnaest, pa ca su odzlata?. Kvragu vi i pemedevori.
-Sriću vam vrag odnija, a što bi ste vi tili za badave. Koliko samo vode triba da budu ovako lipi i mirišljavi.
I tako nikada kraja toj predstavi. Tako su nekima pemedevori mirisali a nekima smerdili. Takav je status ima naš kralj svih jelovnika. U hrvatskom jeziku se za pemedevor rece rajčica, ili paradajz. A, paradajz je paradiso – ca će reć raj. Valjda je pemedevor bi toliko štivan da su ga zvali takvim imenom, pa neka takav i ostane.
Post je objavljen 22.07.2014. u 18:33 sati.