Pregled posta

BELINA MUSAKA

- Ne javjaš se ništa, pred neki dan si još pasa pored mene, ja ti ablendiran a ti se praviš da me ne vidiš.
- Ma di si Ti to pasa pored mene, a da Ti se ja nisan javi?
- Na Škurinje, mujenjace, na rotor.

- Pa ca si cini na Škurinje?
- Bi san u Konzum, žena me poslala da su kumprili na akciju po dvi Kune.
- Mladi kumprili i janjetinu ku si doni za Uskers od Paga, još malo škalonje i ca Tebi triba hodit u Pag?

- Koda tebi ca fali.
- Meni fala dragom Bogu, ništa.
- Jesi vidi Ti moj Bebiću ca se sve dogajalo od Uskersa na vamo u Pag. Jedan mladi život, tako mi je žal toga mladića, pa se slavilo svetoga Juru, pa dan utemeljenja grada, pa opet Doder. Njima u Pag nikad ni dosadno. Više se njima dogodilo u ovih zadnjih misec dan od Uskersa, nego meni u Riku zadnjih pet godišć. I onda će mi opet tlapit kada dojden u Pag: "ti ne živeš ovde". Bogati, koda živeju u Tunguziju. Koda namin ovde u Riku teceju med i mliko.

- Pa ca to meni govoriš?
- Cekan san da ćeš cagod napisat, a od tebe ni sleda.
- Misli san, ali nezna ca bi pisa i od kuda da pocmen. Ne postoji ovakav grad u ovoj državi ki slavi tri dana svoga grada. "Lude ga li grada", reka bi Smoje. Da još bude boje, neznan ako si vidi na portalu Centra za (ne)kulturu i informacije Pag, za podlogu dana utemeljenja, stavili su sliku crikve u Stari grad. Voli bi da mi ti paški (ne)kulturnjaci objasniju kakve veze ta crikva ima sa danom utemeljenja. Kula Skrivanat i Vela crikva sa time sigurno imaju veze, a crikva u Stari grad, nikakve.

- Ma vidi san, ali ca, i kome ca reć?
- Kad ja ca napišen ispada da se mišan u politku ku vodi gradsko poglavarstvo. Ne moren verovat da tamo sediju judi ki po meni imaju nešto uglavu i ki mogu konačno prerizat taj špag, i reć: bit će onako kao je red, a ne onako kako nan paše. Neću Ti o tome više govorit, jer san o tome pisa pa me cudi da to nisi pročita. Ca ne vidiš da su i „mediji“ u službi politike, jer in daju plaću pa pišeju ca ih je voja i kako ih je voja. Koda je to nešto novo.
- Je istina je to ca govoriš, ali onda bi se oni morali pokarat sa polovicon grada.
- Zac bi se morali pokarat?, zato ca bi tribali neke stvari stavit na svoje misto. Ca bi to koštalo grad, da grad slavi svoj rođendan onda kada je rojen, a ne onda kako političarima paše, ili zato ca je kraj Bela reka da je Pag grad? Koda smo mujeni pa neznamo da na Vikipediji lipo piše ca je to grad. Ili su oni na Vikipediji bili toliko pametni da judi prije nas nisu znali ca sve triba da bi grad, bi grad. Mene, prijateju moj više muci ca cinimo da sateremo sve ca je gradsko, nego odluke ke donosiju političari. Toga je mene strah. Jer političari kada svuceju svoje političke maškare, opet gologa obraza moraju pasat pijacon, pa ako misliju da su pošteni moreju svakoga pogedat u oci, ovako tlapimo uprazno.
- Bogami si ovo lipo reka, toga je i mene strah.
- Pročita san jedan komentar na PagPress-u da je tradicija „užiganja Marka“ stara 60. godišć i da moramo priznat da je imamo, pa cagod povjesničari i političari o tome mislili. Onome ki je to napisa moran reć, da povijest ne moreju pisat davno umrli. Oni su tu povjest stvarali, a oni ki su ostali živi pišeju povijest. Zato u ime te povijesti spasimo ono ca imamo dok nas ovi oko nas ne pojdeju ili považigaju. Ca Ti misliš?
- Slažen se sa Tobon ca god receš i napišeš jer vidin koliko si mujen za Pagon.
- Ja san bi uvjeren da ovi ca se zoveju „Paška stranka“, ako ništa drugo da će spasit sve ono ca je paško, ne zato da bi smitali drugima, nego samo zato da bi svoje stavili na svoje misto. Za sada ne vidim puno od toga. Morebit me do kraja mandata demantiraju, a ja ću in bit zafalan za to. Ala, stoj mi dobro, pa kada uvatiš vrimena javi se.

- Ako napišeš cakod pametnog, morebit ti se i javin. Bog.




Post je objavljen 17.05.2014. u 18:34 sati.