Marketing
DVI UPUTNICE
- Ca se ti ne javjaš, kada te zoven na telefon, ca se bojiš da ću ti pitat šoldov?
- Ovaj vikend san bi u Istru, i da me je lipo i mater zvala nebi se bi javi na telefon.
- Lipo or tebe.
- Ni vrag da me zoveš samo zato da bi me pita, kako san?
- Kako si pogodi?
- Triba imat puno možjanov za pogodit.
- Čuhaj me, pita me jedan ca smanon lavra, neka te pitan dali triba jedna ili dvi uputnice za doć na terapiju. Da mu je neki reka da triba samo jedna, a ja znan da san nosi dvi.
- Po novome, tribat će mu samo jedna uputnica, kako je bilo noga puta.
- Koga, noga puta?
- Noga puta, kada je HDZ bi na vlast.
- Jebi se ti i HDZ, sve tiraš na svoju.
- A, ca ću na tvoju.
- Nego da te pitan još jednu. Jesi prati ovi dani ca se dogaja doli. Biskup je sve više u Pag, sva ova caratanija oko maloga Dode, pa njegovo predavanje, pun Knežev dvor judi. Jesi ti to vidi. Vidi san na sliku da ti je brat snima. On sve snima ca se doli dogaja.
- Nisan vidi, ali san pročita, a nisan bi niti pogedat ca je to brat stavi novo na internet, dobro si me spameti.
- Jesi vidi kako se Novajci faliju Caskon, bogati koda je Caska u novajskoj a ne u paškoj vali?
- Ne tentaj me molin te. Sada kada je celi otok piva u Opatiju, i to ti ki si pervi derca u Opatiju, ti opet tentaš, koda ja neznan di to vodi, samo da me užegeš.
- Pa ca san ca krivo reka?
- Nisi niš, krivo reka, ali nisu Novajci krivi ca mi neznamo cuvat svoje. I, ne tentaj me više, jer bi još moga ca mujenoga reć. Ali da ti recen, meni je draže da se to iskopalo i da se prestavilo svitu, nego da je stalo zaprećano ili nedaj Bože da je ki doša sa kakvin detektoron i otkri to bogastvo i prisvoji ga sebi.
- To si pametno reka i ja se slažen sa tin.
- Mi smo poceli malo Stari grad uređivat i istraživat, pa su se smijali sa judima ki su dali svoj doprinos da se to malo pocisti. Znaš kako to gre u našen lipon gradu. Ca će on? ili Ki je on? i nikad kraja tome. Vidiš da smo mi ucinli trejatar i od Dana Grada. Znaš ti koliko se ja put sitin pokojnoga Dinka Dumića, ki mi je jedan put na pijacu nakon koncerta Novih Horizonta reka:"znaš ti Bebiću, zac mi nikad ne moremo poć naprid?". Ne, Dinko zac? Zato ca nan je gornje i donje berdo zatvorilo vidike i daje od Metajne ne vidimo.
- Bome lipo ti je reka, triba zapametit i tu. Znači, jedna uputnica.
- E, jedna uputnica i jedna za u Casku.
- Samo ti zajebavaj, ala pa se za Uskers vidimo doma.
- Vidimo se.
Post je objavljen 08.04.2014. u 18:59 sati.