Ujme oca i Sina i Duva Svetoga !
Ma ča se tot zlamenujete šjora File...rečen ja stavljajući joj na stol škatulu datuli iz Irana.
Ma di te crni đava nosija lipo doli u Perziju....i to poslin svega, poslin operacjuna....s oton novon jetron ?!
Ne...nego ću sad do kraja života stat doma i samo sidit na kauču i gledat televiziju ! Taman posla !
Omar san ja znala da si ti pinku rebambija....ma nisan znala da si toliko maka?
Ajde, pustite Vi to....kušajte Vi ove datule pa onda govorite...A mogli ste se mašit i Vi šjora Ane, Ča ste tako razrogačili oči ? Neće Vas one ujist ! Oli niste nikad vidili datule ?
A bome i nisan...oglasi se , onako ispod glasa...šjora Ane koja je bila svratila kod šjore File na kavu i bokun ćakule i ogovaranja onih kojih tu trenutno nima.
Ja ti, sinko moj, jin samo smokve, prsake, catu, barakokule i groozje. Njanka se ne denjan jist ni jabuke joli oni ananas a troke ote tvoje datule. Nisan ji nikad ni vidila prin....
Ajde, ajde...vidit će te kako su slake !
Prva komadić otkine šjora File, onako s kraja o datule...pa ga stavi u justa i ka neki filozof i puno pametno čejade...nabora čelo, zakoluta jočiman i stane polako zamišljeno žvakat oti bokunić datule....a šjora Ane je gledala u nju otvoreni justa i očiju ka Sveti Toma u prajca....
I...?!
Bogami si dobro reka. Slake su ka cukar...A ti znaš da uz slako gre i prošek...Moga si donit kvarat onega hvarskega...Ne bi ti ruka bila usala...A znan ja da ga kod tebe uvik jema.
Za njon odma otkine komadić i šjora Ane i naravno , sve begenavajući, počme mljackat justima i nekako zadovoljno mumljat....
A jemate prav šjora File...Zbilja nisu za bacit. Ma kušat ću baš još komad .
Ma za Gospu Blaženu uzmite cilu datulu...ča ji tako čokate ka da su sir iz mišine....
Ma dobro govori Marinko...oglasi se zadovoljna šjora File, vaja ji kušat onako cile, u komadu.
A dobro kad Vi kažete, pomirljivo će šjora Ane i strpa cilu datulu u usta sva se nikako pritvorivši ka u malo dite koje je dobilo lizu joli slaju - pa sad gušta....
Ja brzo šmugnem kroz vrata do svog stana , omar priko puta i vratin se s po boce prošeka...koliko mi je bilo ostalo.
E mora se datula zalivat prošekom, mora, rečan ja zadihano.....Dajte dva bićerina šjora File. Ja ga ne smin ni liznit ali Vi, Bogu fala, morete i tribate. To je živo zdravje. Ma prava likarija....Dekot koji je stiga drito s Hvara. Ka da je iz apoteke !
A smi li se doli, u Iran, pit potla datuli, a ?
E ne smi, doli su drugi obićaji i vira jin to brani.
Je, je čula san ja to do jedmega našega susida profešura...A to je velika šćeta....ali ne daj Bože da se ja gren mišat u ote stvari - reče ona mašući svojon takjicon o ruke nikako ukoso ka da je prisikla fetu zraka...dajući tako na znanje koliko je ona shvatila da se u te stvari najboje ne mišat jerbo ju je život naučija da je najzdravije držat se šta dalje od velike pulitike....koju ionako baš dobro i ne razumi .
A iz kojega su dila Irana ove datule, jedva promumlja šjora Ane, koja je izgleda zaboravila stavit dentijeru pa joj ni bilo lako žvakat datule - makar su ove bile lipe, podatne i meke.
Iz Isfahana...To Van je jedno ćudo od grada s najlipšim moston na svitu. To se ne more opisat. Triba ga vidit....A da ne govorin o drugin stvarima, đamijama, kulama, palačama...i o sto drugi ćuda. U temu gradu je i drugi po veličini trg na svitu. Omar je iza onega u Pekingu - ali je najveći ako se računa da je cili ograđen kućama. palaćama, đamijama i bazaron ispod kaskadi. Ja sam tamo bija dva puta do sad a moga bi ić još sto puti i ne bi moga sve obać i vidit !
Ma vidi ti, ko bi reka to....dignuvši obrve zausti šjora File i strusi veselo bićerin prošeka u grlo ....Ma da te ne znam, ne bi ti povirovala.
Eto ti ga na...A bi li ste mi povirovali da Van kažen kako tamo jema i kršćanski crikvi, sinagoga i ča ja znan čega još. Da najviše jema muslimani, ali da su tu još i zaratostrajianci, kršćani i židovi. Da su po ton virskoj pripadnosti zastupjeni i u parlamentu....da su judi puno jubazniji vengo ovod kod nas i da još tvrdidu kako su Rvati u stvari odozdol...iz Perzije i da smo mi jedan jedincati narod ali ka nika različita plemena.
Deboto san se izvrnila sa katrige...Ma ča to prkljaš . mulac jedan ?!
Ajme meni šjora File....Pa i kod nas jema povisničari koji tvrdidu to isto...Pa Vi sad budite pametni ?!
Ma dobro govoriš Marinko makar si i ti iz otega divjega svita pulitike di jema lažovi ka škaje. A jopet tebi nikako ipak virujen.
Fala in....A je li to zarad ovega prošeka...bocnen je ja ?!
Nemoj da te sad bombizan drito u tu čoravu čivericu, tovare jedan da bi li tovare spliski. Fala ti Bože da san sa Šolte a ne iz ovega ludega grada !
Ajde, ajde...samo san se šalija...pa šta Van je !?
Ma dobro i ja san se šalila da si čorav...nakrivi glavu ona i onako potiho, gledajući me stisnutim očima, doda : Ma isto nosiš te očale su caklima debelin ka da su dno o botilje...Ali neka ti uvik bude upomoć naša Sveta Luce....zaštitnica čoravih i onih ča bidni jemadu problema s vidon...recimo, ka ti !
Eto ste me omar proglasili invalidom !
Osib, Isus i Marija ! Ma oslipila ja kobogda ako san ča lošega mislila...počme se ona tuć svojon košćaton šakon u ona svoja kokošja prsa. Znala san ja daš ti na kraju sve izventat i okrenit naopako...Nikad o tebe judsko čejade....Uvik političar..... i to s debelin očaliman i tujon jetron ! Naravski, zdrav ka cekin !
Ma ostavite se pulitike šjora File !
A dobro si me sitija. Jema li doli u Perziju hadezeja. Jemadu li doli Karamarka ?
Ma nima tamo ni hadezeja ni esdepeja ni drugi stranak ka kod nas. Tamo je to sve drugovačije !
Oooooo......To mi je drago ćut. Znači more se doli bez straja duperat crvena zvizda petokratka ?!
A more, ča ne bi mogla ! I ne reče se petokratka vengo petokraka, tako da znadete !
Ma vidi ti vele pameti u našega Marinka...Sve on zna najboje...A mi smo svi ka injoranti i cukuni...La te vojo !
Nisan Vas ja tij poć vriđat. Nemojte se sad tot bez veze šticavat !
Ma jebe se mene ča se ti činiš pametan...jerbo se ti moraš pritvarat da si pametan, ka i svaki političar....a ja sam, da ti se pofalin, pametna od rojenja i bez tih tvojih skuli. Uostalon svako malo čujen kako je niki političar izventa da je zavrsija niku velu skulu joli je falsificira svoju diplomu. Morete gujicu otrat s tin vašin falšin diplomaman. Ionako ne morete bit veci kreteni vengo ča jeste.
Asti ga sto ! Ča je sad ovo ?
Nego ča !? Pa kome more past na pamet poć zabranjivat crvenu zvizdu ? Samo zvizdunu ! I to teškemu zvizdunu - da ne kažen koju goru, jer mi vira i materin i čačin odgoj, Bog jin da pokoj vićni, to branidu !
Pa je....
Ma koja pamet to more samo izventat ? Pa taj kretino bi i križ sutra zabranija zaraj Inkvizicije joli oni konkvistadori ča su potaracali bidne indijance u onu tvoju Južnu Amerika. Ma koji lude to more reč ? Pa meni je po roda poginilo braneći Rvacku i Šoltu od talijanci, čerkezi, njemac i pitaj Gospu Blaženu koga...a sve s crvenon zvizdon na kapi. I ča su oni sad ? Zločinci !I još čujen da je on, ka, niki profešur o povijesti...!
Pojma nemam...
E moj Marinko, još ti nisi izaša iz bumbaka....još ti ne znaš ni po mise. Zato ja sve take šajen drito u zvizdu materinu pa neka se lipo vrate tamo odakle su i došli !
Post je objavljen 23.03.2014. u 08:46 sati.