Ala koliko govan jema meju nami !
Za Gospu blaženu a oli ste skroz naskroz išempjali moja šjora File ?
Ma kako to govorite ?
Ma koje samo šporke riči izlazidu jutros iz vaših just ?!
Evo, ja to ne mogu, njanka, slušat.
Je, je... našla se mustra koja će meni držat pištulu !
Ajde boje ti je sakrij se tamo da te ne vidim....Baš i mislin na nike političare kad govorin o govniman...a da ča si mislija ?!
Ma našlo bi ji se i meju nikin drugin profešjunima...
E to si dobro uboja, mali Marinko, ka čorava kokoš u zrno kukuruza.
Ča se toga tiče jemaš prav...
Eto jesi li vidija onega. bože mi prosti, tukca nad tukcima i materinog imbečila ča se istovarija u vrčinu pa je onda s otin svojin sabranim dilima zasuja na Pjacu onega literatu i novinara Antu Tomića.
Ma koja pamet more to izventat ?
A pamet o tića !
Ma puno si reka. Nema oti u tintari ni tičjega mozga ali govnar se more falit i dičit jedino svojin govnima. On je prosuja na čovika ono najpametnije ča je jema i ča je moga dat o sebe !
Ma sve govorite ka da čitate Sveto Pismo !
Govna su meju nama , moj Marinko. I to kakva ! Velika da veća ne moredu ni bit. Vonjaju okolo na kilometre. Nemoš o smrada. Oni su odajuće fonje i ništa drugega. Jer samo se govna mogu itat govnima i glumatat face. Jerbo nimadu ničaga u sebi. Njanka pinku mozga , nimadu ni riči niti ičega juskega u sebi , e...osin tih govana ! A govna jemadu i šimije - samo ča su one pametnije i đentilastije o otakih ka ča je oti junak sa splitske Pjace kojemu sva pamet stane u kontu od govana.
Ajme ča ste se užgali, šjora File !
A dašta ću vengo se užgat !
Ka da je boji oni Karamarko kad u Omišu na stranačkoj fešti hadezeja begenaje, plješće i odobrava kad vriđaju familju pridsidnika države i kad cila dvorana pravi ovacjune i s oduševljenjen odobrava pozive na klanje na koje javno zovedu niki njiovi geniji i domojubi posebnega kova - sa balkona o dvorane u kojoj se fešta hadezejova demokracija !
Ka da to nisu ista govna ?!
Znači čuli ste za to ?
Da čula ! Pa po grada samo o temu govori. Pitadu se judi a ča bi ovi radili kad bi se dočepali vlasti ? Bili vodili jude na jame - kad plješćedu onima koji tako govoridu a Karamarko ji otvoreno fali jerbo mu, eto, takvin dovicima dižedu atmosferu u dvorani pa bi ji on vodija uokolo sa sebon i po drugin njiovin stranačkin dernecima.
Deboto san se i ja izvrnija sa katride kad san to pročita. A bija san u Albaniji u Tiranu kad san to sazna...
A di i tebe đava sve ne nosa ?!
Mora san poć tamo. Taki mi je posa a meni se judi tamo puno sviđaju, bija san puno puti u Tiranu i uvik san doživija samo dobro...ali pustimo sad to.
Virujen ti, moj Marinko...Ma nima nigdi ovaki pizduni ka ča su kod nas. Teškoš ji nać bilo di na svitu ! Bar si ti vidija svita...pa i sam znaš....
Pa sad....
Ajme. nemoj mi samo sad udrit ovod tvoju meškinjastu pulitiku i počet vrdat mrdat. Reci in lipo šćeto neto ča ji gre ! Reci jin to drito u čunku ako jemaš muda !
Ma....
Eto ti ga na...Znala san ja da nima ništa od tebe...Nimaš ti kurađa ka ja. Evo da je, recimo, mene puštit samo jedan dan u Sabor pitala bi ja. na cili glas da me svi čujedu, i onega našega sadašnjeg župana Ževrnju i tvog bivšeg studenta i župana Antu Sanadera, pa onega profešura Škorića...ča je bi poteštat od Omiša...pa sad čitan i ovo i ono o njemu u fojima, pa onda lipo onega Antu Babića, ča je prišidente o općine Lovreć i ča isto sidi u Saboru ...pa onega bivšega magistra Milijana Brkića.....a ča ji je to natantalo da onako oduševljeno plješćedu kad je oni njiov hadezejac viknija sa balkona da bi sve vas iz sadašnje vlasti tribalo itnit u jamu ?!
E to bi ja njih pitala...pa neka mi odgovoridu ako su judi a ne govnari koji pokazijedu jedno lice kad su nasamo sa svojiman a drugo lice kad govoridu narodu na televiziju ili u Saboru !
Dobro...dobro...Nego oćete li. šjora File, bićerin prošeka ?
Kvragu ti i tvoj prošek....Znaš koja je ura kad mi nije ni do njega. Ne more ni on ubit ovoliki smrad koji se širi od toliki govan koja su meju nama !
Post je objavljen 26.02.2014. u 08:20 sati.