Ajme majko luda vrimena....Ne sićan se kad me vako smantalo...Nima njanka jednog refula bure..Samo jugo, evo će bit već par miseci. Nemoš o tepline ! I ovo mi je neka vejača ?! Ma, kažen ti ja, išlo je sve u prdec moj Marinko, pa ti govori šta oš !
Ajme meni šjora File. Ma nema dana kad Vi ne grintate, brontulate i prigovarate onako dosadno ka čimavica! Uvik Van ništo smeta. Je li zima - nevaja ! Je li teplo - još gore ! Pa ne more Van ama baš sve uvik smetat ! Nikako Van ugodit. Da mi je samo znat o koje ste to Vi race judi ? Ma koje ste Vi čejade ? Ka da ste se rodili u bumbaku u niku gospojsku familju di su Vas tetošile i begenavale Van po cili dan služavke i guvernante - a ne na šoltanskoj škrapi, u težaćku i ribarsku familju... usrid vinograda ?!
Aj , mulac jedan, lovit rake govnjare ! Mene si doša zajebavat ! Nego šta da san se rodila u težačku i ribarsku familju...Poštenu i radišnu da poštenija i radišnija ni mogla ni bit ! Pa ča onda ? Oli su za to one kokole iz gospojskih familja ništo boje joli možda važnije od mene ? I ti si mi niki ka livičar ? Jesi malo sutra ! Evo si mi omar diga tlak na miljun ! Sva san se infotala !..Nemoj samo da mi padne mrak na oči jerbo bi te sad mogla s ovin rukaman zadavit ka tića...počme ona mavat svojim košćatim rukama ka ono kriliman na vitrenjačama od bidnega Don Kihota.
Ajme ča ste Vi neke nagle naravi !
E jesan, nego ča da jesan...Posebno kad ovako pričan sa kumplirima od judi, ka ča si ti. A da znaš i škina me boli...jema već tri dana, Sva san se ukočila !
Ajme skužajte šjora File, evo Van na katrida, pa sidite...rečen joj ja dodavajući joj katridu Jo izvinite ča se nisan odma sitija !
Tiš se sitit ? Neš ti vele pameti u tebe ! Nego jemaš li još kap onega prošeka u veltrini ?
Jema, jema....kako nima - skoćin se ja odma pa stavin bićerin i botilju prošeka prida nju.
Evo jema i fritul sa suvicama. Punica ih je sinoć radila.Odlićne su. Pivadu sto jezik ! Ajde mašite se slobodno šjora File moja - rečen joj ja nalivajući joj bićerin.
Ajde. Bog ti pamet prosvitlija, Vidin ja da ti i nisi toko loš ka ča izgledaš !
Ma škužajte šjora File moja dobra po sto puti. Nisan Vas tija poć vriđat. Pa znadete baren Vi najboje da su i moji bili obišni splitski težaci i obišan radan svit ča je po cili božji dan bi u poju s karon, kozon i konjen... su tikvicon bevande i bokunom suva kruva i štogod za prigrist. Sve je to bila velika mižerja !
Je...ka da je sad boje ! Aj muči tamo !
Ne kažen ja da je dobro...ma ni ni lako doć na vlast poslin onih...
A njih mi, boje ti je, ne spominji.... užge se omar ona. Evo san se odma uzbudila. Daj nalij mi još jedan bićerin...A je dobar ovi prošek...ko ga je radija da radija, svaka mu ćast ! Ti znaš, Marinko, da meni omar uzavriju možđani kad mi ji spomeneš !
Ade smirite se šjora File. Nemojte se opet živcirat !
Ma ča neću ? Nego ča da oću ! Evo baš oću ! Dobro nisan pala u afan kad san ono nikidan slušala onega Crnega Marka navrj spliske rive di govori kako nima on ča odgovarat za lopuže iz svoje stranke ! A gaće su nan skinili trpajući u svoje žepe.....sve derući se kako je to domojubni interes Rvacke...Ma ča se neću jidit ? Evo sad bi ja poludila od muke. Ma rekla bi mu ja ča ga gre samo da mi ga je dikod trefit digod po gradu !
Ka prvo ni on nikakvi Crni Marko. šjora File, Čovik se zove Karamarko !
E je si pametan, nima ča ?! Nije govno nego se pas posra !
Pa to Kara u cilemu svitu znači Crni !
Ma neće bit baš tako !
Ma čaš ti meni poć tod palamudit ! Svi ste vi političari isti, Samo ga ti brani ! Naša lonac poklopac !
A nećemo se sad poć vriđat šjora File...e, molin lipo !
Pa dobro cukunu jedan da bi li cukunu splitski. Mandrilo jedno obišno ! Cili san život, još dok san bila ka bambina , slušala o Kara Mustafi, pa onemu, kako se ono zva, a... Kara Đorđu...pa Kara ovemu...Kara onemu...Ali sve je to bija niki tuji judi, tuji svit. Bome u cilemu svon životu , a fala Bogu baren godina jeman priko svake mire puno, nikad nisan čula za nikega našega Kara Juru, Kara Stipu, Kara Ivana...Štaš ti mene sad poć učit pameti kad san ja za tebe Salamun...i to koji ! Eto, samo da znaš ! Pa ti i dalje pivaj svoju !
Ajde dobro, neču se ja sad poć sa Vama karat. Govorija ja ovemu zidu ili Vama ionako mi je sve isto !
Eto san sad najskoli postala i zid. Za Gospu blaženu ča ja još neću ćut u ovu kuću ?! Aj nalij ti meni još jedan bićerin, sva su mi se usta osušila.
Ja joj nalijen...i sve je gledan ispod oka i vidin da se cila nakostrešila. Ajme meni, mislin se ja - sad če počet bombizavat !
Nego. slušaj ti mali, nekako ka pritečin glason počme ona sporo govorit...drito me gledajući u oči.
Ma jesi li ga ti čuja...?
Ma koga ?
Karamarka...Karamarka....Nije valjda moga pokojnega oca, Bog mu da pokoj ! ...počme ona ka drečat se na mene gledajući em fišo u oči tako da joj nisan nikako moga nikako uteč pogledon.
Zamisli ča je njemu palo na pamet ! Ma zamisli samo ! Reka je da su ti njiovi stranački lopovi ka niki mali miši za razliku od vaših ! Ma zamisli ti, dite moje...izbeči se ona...Ma samo ti to zamisli koji je to kurađ govorit tako usrid Splita i ostat živ ?! A pržuni su jin puni od pridsidnika njiove vlade i stranke pa sve do ministri, poluministri, doministri, šefova i ovega i onega...Ma zamisli ti samo koju šjolu od obraza jema taj čovik ?! Ma meni to nikako ne gre u ovu staru glavu !
Ma nije baš to sve tako šjora File...Polako, polako s ričiman...Koji ministri...?
Kad se ona ujedanput skoći sa katride , uvati se za rub od stola onin svojin krakatim rukama ,nagne se prima meni i kaže mi onako bisna....Ma ne ćudin sa ja ni njemu ni njegovima vengo vama, lipi moj Marinko - ča mu drito u facu ne kažete ča ga gre ! A on onako ispo nosa, gledajući u pod stalno mrmja gadarije o vama...Još ćete vi ispast lopovi a oni sveci. Eno Van ne dadu u Vukovaru ni pridsidniku države, ni vlade ni Sabora da gredu mirno odat počast našin branitejima. Pa di to jema ? More bit u onu tvoju Latinsku Ameriku ? Ma koliko znan nima toga višje ni doli. A po vlade su van braniteji. I to pravi ! Čega se vi jemate plašit...? Pa ni ovi narod pokvaren vengo zlovojan, prizlovojan i štuf svega. Oče mirno živit a ovi Crni Marko bi sve na tuču, na mržnju, na kopanje ratnih sikir...Pa ako je tako uzmite i vi u ruke baranko tamperin ako već nećete sikiru !
Koja Vas je sikira sad spopala ?! Oli ste i Vi porebambili !?
Ma mislin na to da ne mučite ka mone nego da jin kažete ča ji gre i basta !
Pa govori se !
Ma vas se nikako slabo čuje, sunce mole lipo. Znan da ni lako ali i ono ča ste napravili - nikor za to ne zna. Ka da ste mutavi ! I neču da te čujen da mi sad udreš kontru - jer ću te cilega satrat u papar...jesi li me dobro čuja ! Zapriti mi ona na kraju.
A duga stvar. Eto Karamarko usrid našega Splita kaže kako su njiovi lopovi mali miši. E Marinko moj, Marinko...Joli ne vidiš da je to
STRANKA MALIH MIŠI ! Pa to jin i sam pridsidnik govori, a on to najboje zna, jel tako ?!
Ko.... Karamarko ?
Ne, vengo MICKEY MOUSE !
Post je objavljen 15.01.2014. u 08:55 sati.