Marketing
PAGEXPRESS
- Ca je, jesi vidi niki ništa ne piše, toliko se toga u Pag dogaja, nanka besede nidi.
Ovako govori pažanin ki je na terapiju kod mene i dah grada ćuti se u našin besedamin. Kuntreštajemo se, nedamo gušta jedan drugome, ali otvaramo sve teme ke' su vezane za naš rodni grad.
- Ma ki' više ništa ne piše?
- Prije si ima u Novi List svaki dan neku besedu, sada više ništa. Nastavja on daje.
- Niti na internet više nimaš ca pročitat, sve su pogasili te stranice. Jedino još ti pišeš pizdarije, ali mi je sve jedno drago pročitat ca pišeš, jer pokažuješ da nisi neuk. Kada mi ovdi govoriš o Pagu i Pažanima, vidim da ti poznivaš više judi i da boje znaš za neke situacije, doli nego ja.
- Jebemi se ki' će pisat ki' neće, i kome se pjaža ili nepjaža ovo ca ja pišen. Da Ti se ne pjaža nebi ni Ti čita te pizdarije.
- To je istina, ali mi ni jasno kada uvatiš vrimena to pisat i kada najdeš sve to ca pišeš?
- Ca Te Briga! Prepišujen od drugih.
- Zajebavaš Bebiću.
- Baš mi je drago da si napisa onih par besed o Borisu Caskinu od Nevaje, da nebi bilo kako mi Pažani uvik govorimo protiv Novaje.
- Ni Ti boje da si u Pag, nego ca se sada skićeš po Riki i neznaš di ćeš sam sa sobom.
- A, ca ću cint doli. Od kafića do kafića i opet se dat lokilu.
- Moga bi hodit na lignje.
- Jušto kako i ti. Ti nanki neznaš ca je tunja ili šuštavica.
- Glavno da Ti znaš.
- Da te ne zaboravin pitat. Da ti donesen još travarice?
- Donesi, ca si škertav, svi ki mi dojdeju u kuću, pijeju samo pašku travaricu.
- Kupi san u Goleše, ali je litra 65. kun. Ko' da je odzlata.
- Ca Te briga i ovako si reka da više ne piješ.
- Samo ti zajebavaj. Ja san svoju miru popi i dosta je više, još bi sti ko' godišće uvatit. Strah me je kada vidin koliko ih je već od generacije partilo.
- Stislo Ti se, a?!
- I Tebi bi se.
I tako svaki dan, ku' god temu otvorimo ovako sverši. Onda se nasmijemo, jer i sami znamo da ne moremo ništa prominit, ali opet nan je drago da moremo govorit o našen gradu, ki je i za mene i za njega centar svita.
- Jesi vidi Bebiću, ki to grad na svitu ima: paški sir, paška čipka, paška janjetina, paška skuta.
- Jesi sve nabroji? Nisi baškotini spomenu.
- Jebi se, ki će se sve sitit.
- Lipi naš Pag.
Post je objavljen 30.12.2013. u 22:37 sati.