Marketing
Badnjak ujutro na rivi
Da čovik ne poviruje! 
Nije mi baš petjnajst godin, ali STVARNO se ne sićan ovakovoga vrimena u ovo doba godine. Sve je procvitalo, ka da je proliće, i stare žilave smokve su počele bacat pupe a još nisu svi listovi poispadali sa nji. Razbiće nan se ovo obaglavu, jer kad zakija, sve će smrznit pa ćemo frute & verduru gledat samo na reklaman od trgovački centri.
Briga me sad za globalno zatopljenje ... guštan na mašogradskoj Rivi, nije da san u kratke rukave, ali san zavrnija ovi jedan jedini ča ga jeman. Fibra je u zraku debelo dvocifrena, i na suncu je skroz ugodno stat. Jedino kad se malo makneš u ladovinu, sitiš se da je već četvrti dan kalendarske zime.
U takovome netipičnome ozračju (ko je spomenija „Bijeli Božić“) odazvali smo se pozivu MO Kaštel Sućurac, koji je danas, na Badnjak 2013. godine organizira diljenje bakalara i vina kraj okićene jelke na podan staroga kampanela ...
... u iščekivanju ...
I ja san vrime dok nisu došli kazani sa bakalaron iskoristija da se slikan sa lišpin dilon postave MO za serviranje ...
Začas je doša prvi kazan, i tribalo je provat je li sve pod kontrolon ...
Naravno, sve je bilo u najbojemu redu, i prvoborci o' kazana su uskoro nastupi. Kakva bi to bila fešta u selu, i šire, da Jajac ne igra u prvoj petorki 
Tajana je, za drugin stolon, bila zadužena za tekuća pitanja, pogotovo ono najsudbonosnije: crno oli bilo?
Postava za stolon o' spize se dodatno pojačala, tribalo je sve podilit dokle se ne oladi ...
Kazan se praznija brže vengo državna riznica ...
... pa san se moga i ja mašit za jednu porciju. Sa malo biloga, ofkors ...
Sve moje pohvale meštrima o bakalara, ko bija da bija, odavno ovako ukusnoga nisan izija. Vidin da se već skupilo i svita ... bilo oni ča su na miru kusali svoju porciju ...
... bilo oni ča su sa strane komentirali ...
... a galebi sa strane mirno čekaju i nadadu se da će i za nji ostat koji bokunić
Kako bilo da bilo, još jedno lipo blagdansko druženje je za nama, vidićemo se još, u zdravlju, ove godine ....
Zdravi i veseli bili! 
Update:
Kakvo bi mi bili selo, da ne rečen Mašograd, kad ne bi sve radili ne uduplo, nego u troduplo. Dunkve, nije se samo kraj borića dilija bakalar, vengo i kod Matele. Neki su bili samo na ovi prvi, a nisu tili/smili poć na ovi drugi. Naša posla ... pridugo bi trajalo da van objasnin 
Ali ništa nije spriječilo našega vridnoga videjo-kroničara @iskrenoga da zabiluži sa kameron CJELOKUPNA jutarnja događanja na mašogradskoj Rivi za Badnjak
Na dobro van doša Badnjak ...
Post je objavljen 24.12.2013. u 18:51 sati.