Marketing
IMAMO GRADONAČELNIKA !
Da san zadršku kod zadnjeg teksta za izbor gradonačelnika u mom gradu i koda mi je ki govori: „Branimire ne zalećuj se, gradonačelniku ćeš čestitat kada utakmica sverši“. Samo da nebi bilo kako nam porucuje grafit na turistički spremnom Bellevueu.
Sinoć je fala dragom Bogu sveršilo još jedno rukometno prvenstvo Hrvatske, ali i izbori u ovoj lipoj našoj. Odma potli utakmice partili smo za Pag. Kako je utakmica sveršila u devet uri, zna san da me ceka vozit „okolo“. Jušto je bila ura popolnoći kada smo došli doma. Mat me je docekala da je pobjedi Željko Maržić. Neka je baš mi je drago.
Uvik govorim da Golija daje najboje jude u Pag. Željko, čestitan Ti na izbornoj pobjedi, timun sada imaš uruke i verujen da ćeš brod vodit, ca bi reka moj otac: „po kursu koga je kapetan zacrta.“
Pita me Madonka:- pa ca si jut?
Kako neću bit jut,kada mi je zub puka, i red mi je sutra poć kod zubara. Ca san doša u Pag zubi popravjat ili kaić hitit umore?!
Jutros odma gren do ambulante, da riješin zub. Primila me je dr. Kalauza-Oguić, i sredila mi zub. Jedno drago stvorenje, sa svojon asistenticon, građani grada Paga i gosti ne moraju brinut di će popravit zubi, pogotvo ako se dogodi ovako kako i meni da ti pukne zub, baš kada dojdeš na godišnji odmor.
Vidin da je Lokunja raskopana, koda je jenar misec, a ne dva dana do lita. Umisto da je sve urejeno i u cviću, ono sve u pepecini.
Baš je lipo vidit Jovićev „Olympico“, jedna divota, a Bellevue još lipši. Tobogan, lipo urejen, pituran, ono par judi ca se kupa na plažu, uživa u idili paškog krajolika. Kako san sretan da moj Pag sve više lići na Opatiju. Jedna, beleca.
Željko, ceka te posla koliko oćeš, ja Ti želin kada capunon udreš u zemju, da odma to i poravnaš, da nas ova paška pepecine ne pokrije.
Kaić mi je bi pun kišnice, slobodno je moga doć dežurni meteorolog izmirit koliko je dažja palo. Ca se više ne miri koliko je dažja palo, pitan mater? Ca ne zanima više solanu koliko je gradi kiše palo? Po mome kaiću ja bi reka priko 200 gradi. Red mi je pošpugat kaić, nasuho.
Sada san doma pa ću nastojat zabilježit događanja u mom gradu, iz mog kantuna.
Okrenimo se litu. Živili Bili!
Post je objavljen 03.06.2013. u 20:56 sati.