Marketing
DAN GRADA PAGA – post festum
Kako je vrime relativan pojam, a ja ga očito malo iman, ne stignen sest za kompjuter i napisat par besed, a toliko se toga dogajalo ove dane u Pag. Od proslave Dana Grada Paga, pa do Lokunje, kanalizacije i ca ti ja znan ca se sve ni dogajalo.
Ja ću samo par besed o proslavi Dana Grada Paga. Prošlo godišće san napisa post, ali nisam osjeti da bi triba stavit link u komentarima na ove gradske (privatne) portale ki nas Pažane i sveukupni puk, izvješćuju ca se dogaja u grad Pag.
Prošle san godine napisa da mi je bez veze, da san ja recimo rojen 31.07. a da rojendan slavim 1.10. Međutim poglavarstvo Grada Paga nan i dalje daje do znanja da će se Dan Grada Paga slavit onako kako oni to odrede, bez obzira ca Grad Pag, kao jedan od rijetkih gradova u ovoj nan Europi u ku ćemo tobože doselit se u misecu mojeg rojenja, ima svoj kersni list. Preporucan građanima Paga, da pokrenu referendum po tom pitanju, kako građani Dubrovnika za berdo Srđ, u ime golf igrališta. Pa ca građani odluce na ton referendumu, tako bi tribalo bit.
Najprije san najviše sretan da je jedan veli Pažanin Dušan Paro dobi Nagradu Grada Paga uz znak priznanja za izuzetan doprinos u promicanju rodnog mu grada Paga kojeg je otpiva u mnogin svojin pismamin.
Dušan je prilikom primanje nagrade reka i ovo: "rado pišen pisme o Pagu jer Pag volin i uvik se rado sićan judi i vrimena kada san živi u Pag".
Ki more napisat ovakve stihove:
Volim Te lipu Pagu moj
U Tebi mladost je moja
O, grade najlipšeg škoja
Ja ću Ti opet doć.
Ovo more napisat samo on, ki svin sercen voli svoj rodni grad. Kome se to na svitu rece "volim te"?! Svome gradu reć: "volim te". Ako je Arsen Dedić reka da se on i Zagreb vole tajno, onda za Dušana mogu slobodno reć da se on i Pag vole "javno". Prvi puta u javnost dajen sliku sa promocije ove himne svome gradu. Triba ca dodat?!
Međutim smelo me je daje u tekstu na portalima, kada su napisali da je on podrijeklom Pažanin. Vamo Dušan govori da je rojen u Pag, a onda ovi govoriju da je podrijeklom Pažanin. To znači da on ki je rojen u Pag, a ne žive u Pag je onda podrijeklom Pažanin. Zamalo mi je serce stalo. To znači, da san ja rojenjen Pažanin, a sa obzirom da dva dela svoga života ne živen u svon rodnom gradu, onda san i ja podrijeklom Pažanin. Ne moren verovat.
Ispada da oni ki sada živeju u Pag a rojeni su u Zadar, Riku, Zagreb, Split itd., su Pažani, a mi ki smo rojeni u grad Pag u rodilište na Prosiku, kako i ja, smo podrijeklom Pažani zato ca ne živen u Pag. Meni kako i Dušanu u svin dokumentima u mjesto rojenja piše, Pag. Svima drugima ki nisu rojeni u Pag, piše in di su rojeni. Ja recimo mislin, a možda falivan, da su moja dica podrijeklom Pažani, jer in je otac Pažanin, ali moje svo troje dice je rojeno u Riku.
Ca reć na kraju, dragi moji Pažani i svi ki se tako osjećate, a i svi Pažani ki niste rojeni u grad Pag. Volite svim sercen svoje rodne gradove i nikada ne zaboravite da ste baš u njih rojeni odabiron svojih roditelja. Moji su stili da se rodin u grad Pag i zato ga toliko "volin". I nemojte mi nikada reć da san ja podrijeklom Pažanin. Ja san rojenjen Pažanin i time se dicin. Dali je to malo, prosudite sami.
Post je objavljen 14.04.2013. u 19:14 sati.